Болаларни ҳимоя қилиш кунида LUKOIL Uzbekistan Operating Company МЧЖ кўмагида «Халқлар дўстлиги» катта концерт майдонида «Менинг бахтли болалигим» номли байрам концерти бўлиб ўтди. Концерт минглаб ёш томошабинларга чексиз қувонч ва завқ бахш этди.
Биз барчамиз инсон ҳаётининг энг ёрқин ва беғубор даври — болаликни бошдан кечирганмиз. 1 июнь бутун дунёда нишонланадиган Халқаро болаларни ҳимоя қилиш куни биз катталарга вазифамиз ҳар бир болани бахтли қилиш, унга хурсандчилик бериш эканини эслатиб туради. Бу кун жамиятга ҳам бола ҳуқуқларини ҳимоя қилиш, болаларнинг ўқиши, ривожланиши ва келажакда ажойиб ота-она ва ўз мамлакатининг фаол фуқароси бўлиб етишиши учун барча шароитларни яратиш зарурлигини эслатиб туради.
Ушбу байрам болаларга ғамхўрлик қилиш ва меҳр кўрсатишда иштирок этишнинг ўзига хос кунига айланди. Ушбу хайрли ишга LUKOIL Ўзбекистон компанияси ҳам катта ҳисса қўшмоқда. LUKOIL компанияси хайрия лойиҳаларининг аксарияти болалар лойиҳаларини қўллаб-қувватлашга қаратилган. Жисмоний жиҳатдан имконияти чекланган болалар, меҳрибонлик уйларининг тарбияланувчилари ва кам таъминланган оилалар фарзандларига алоҳида эътибор қаратилмоқда.
LUKOIL компанияси ўз ишлаб чиқариш фаолияти йўлга қўйилган минтақалар — Қашқадарё ва Бухоро вилоятларида меҳрибонлик уйларини қўллаб-қувватлаш бўйича мунтазам равишда тадбирлар ўтказиб келади. Хусусан, узоқ йиллар давомида 10 та интернатда йил бўйи ичимлик суви етказиб бериш молиялаштирилган, Қаршидаги 18-сонли кўзи яхши кўрмайдиган болалар учун мўлжалланган интернатда яшаш ва ўқиш биноларида таъмирлаш ва жиҳозлаш ишлари олиб борилди. Компания Қарши ва Бухоро шаҳарларидаги кўришда нуқсони бўлган болаларга Брайл ёзуви бўйича китоблар ва ёзув жиҳозларини тақдим этди. Бундан ташқари, ҳар йили Бухоро, Қарши, Тошкент шаҳарлари ва Тошкент вилоятидаги 2000 дан ортиқ болалар LUKOIL компаниясидан байрам совғаларини олишади.
LUKOIL компанияси томонидан Ўзбекистонда маданият, таълим, спорт ва тиббиётни ривожлантириш лойиҳаларини қўллаб-қувватлашга ажратилган хайрия маблағларининг умумий миқдори 25 миллион доллардан ошиб кетди.
LUKOIL компанияси ҳомийлигида Халқаро болаларни ҳимоя қилиш кунига бағишланган кетма-кет иккинчи йил ўтказилган «Менинг бахтли болалигим» деб номланган байрам концерти Ўзбекистон болалари учун ёрқин воқеа бўлди. Халқлар дўстлиги саройи майдонидаги очиқ осмон остидаги концерт ўн мингга яқин одамни йиғди. Ёрқин ва унутилмас байрамга Тошкент шаҳридаги меҳрибонлик уйлари болалари ва мактаб-интернат тарбияланувчилари таклиф этилди.
Концерт дастури турли мусиқий танлов ва томошаларнинг ёш иштирокчилари, ўзбек операси ва эстрадаси юлдузлари, ёш доирачилар ансамбли, цирк артистлари ва «Катта қўғирчоқлар» театри актёрларининг ранг-баранг чиқишларига бой бўлди. Рус ва корейс маданият марказларининг кичик артистлари томошабинларни ўз истеъдодлари билан ҳайратда қолдиришди. Ёш истеъдодлар ўз тенгдошлари ва катталар учун ҳақиқий байрам яратишди.
Ҳар бир чиқиш рақс ва қўшиқлар, театр томошалари гулдурос қарсаклар билан олқишланди. Байрам тиниқ осмонга ҳаво шарлари учирилиши билан якунланди, ушбу шарлар билан ер юзидаги барча болаларга тинчлик ва эзгулик тилаклари учиб кетди.
Болаларни ҳимоя қилиш куни — бу ёз фаслининг бошланиши, болалар учун узоқ кутилган таътил, илиқлик ва қувонч улашиладиган вақт билан белгиланади. Болаларнинг орзулари ўсиб келаётган ёш авлод келажаги учун масъул бўлган катталарнинг меҳри ва ғамхўрлиги байроғи остида рўёбга чиқади.
Реклама ҳуқуқи асосида.
Изоҳ (0)