Жорий йилнинг 23—24 май кунлари Ўзбекистон Республикаси делегацияси Вена шаҳрида бўлиб ўтган Euromoney 2022 — Марказий ва Шарқий Европа форумида иштирок этди. Делегация таркибида «Олмалиқ КМК» АЖ раҳбарияти ҳам бор.
Маълумот учун, нуфузли Euromoney нашри томонидан 27 йилдан бери ташкил этиладиган Марказий ва Шарқий Европа форуми ушбу минтақага қизиққан молия бозори иштирокчилари ва инвесторлар учун энг муҳим йиғилиш платформаси ҳисобланади.
Форум дунёнинг 50 дан ортиқ мамлакатларидан ташриф буюрган 1200 га яқин делегатлар, 600 дан ортиқ халқаро банклар, инвесторлар ва компаниялар ҳамда 100 дан ортиқ спикерлар иштирокидаги панель сессиялар, муҳокамалар ва тақдимотларни ўз ичига олди.
«12 та турли фондлар, банклар ва консалтинг компаниялар вакиллари билан учрашувларда ҳамда панель муҳокамаларида комбинат раҳбарияти томонидан ОКМКнинг молиявий ҳолати ва режалари бўйича маълумот берилди. Халқаро инвесторлар комбинат билан ҳамкорликни жуда истиқболли деб топдилар. Халқаро капитални ўзимизга жалб қилган ҳолда инвестицион лойиҳамизни жадаллаштириш мақсадида биз илк навбатда молиявий натижаларимизни тўғирлаб, ESG аудитни амалга ошириш, IPO’га чиқиш ва евробондни чоп этишни режалаштирганмиз», — дейди ОКМК бошқаруви раисининг рақамлаштириш бўйича ўринбосари Абдулла Азизов.
Учрашувлар давомида халқаро инвесторларга Ўзбекистон Республикасида макроиқтисодий барқарорликни таъминлашга қаратилган самарали чоралар, давомли ислоҳотлар, 2022—2023 йилларда акцияларни маҳаллий ва хорижий фонд бозорларида оммавий жойлаштирилиши режалаштирилган UzAuto Motors АЖ, «Ўзметкомбинат» АЖ ва «Олмалиқ КМК» АЖларнинг молиявий ҳолати ва режалари, шунингдек, давлатимизда инвесторлар манфаатини ҳимоя қилишга қаратилган амалдаги қонунчиликдаги ўзгаришлар бўйича маълумотлар берилди.
Ўзбекистон делегациясининг Европанинг қатор давлатлари бўйлаб ташкил этилган Roadshow учрашувлари давом этмоқда.
Маълумот шериклик ҳуқуқи асосида тайёрланди.
Изоҳ (0)