26 май куни пойтахтнинг Бектемир туманида RWS Optimum саноат кластери негизида Zeppelin концерни билан қўшма корхона очилди. Янги завод Caterpillar қурилиш ва тоғ-кон техникасини йирик узелли йиғиш, сотиш ва техник хизмат кўрсатишни таъминлаш учун мўлжалланган.
Очилиш маросимида АҚШнинг Ўзбекистондаги Фавқулодда ва мухтор элчиси Дэниэл Розенблюм сўзга чиқиб, Caterpillar ўз саноатида жаҳон етакчиларидан бири бўлиб, маҳсулотларининг изчил юқори сифати ва ишончлилигини кафолатлашини таъкидлади. Шу билан бирга, ишлаб чиқаришнинг очилиши бренд ва ўзбекистонлик ҳамкорлар ўртасидаги узоқ муддатли ҳамкорликнинг янги босқичидир.
Дарҳақиқат, компания республикада кўп вақтдан буён мавжуд бўлиб, дилерлик тармоғи орқали харидорларга асбоб-ускуналар етказиб бермоқда, бироқ қўшма корхона ташкил этилиши эндиликда ҳам давлат секторига, ҳам тадбиркорлик субъектларига ички бозорда Caterpillar техникасини харид қилиш имконини беради.
«Айнан сўнгги беш йил ичида Ўзбекистон иқтисодиёти очиқлигининг ўсиши ва инвестиция муҳитининг яхшилангани Америка технологиялари ва муҳандислик тажрибасини саноатнинг турли тармоқларига жорий этишга хизмат қилмоқда. Бу эса Ўзбекистонга йилдан йилга ўз мақсадларига эришиш имконини бермоқда», – дея таъкидлади Дэниэл Розенблюм.
Технологик жиҳатни эслатиб ўтиш алоҳида эътиборга лойиқдир, чунки хорижий инвестициялар оқими ва иш ўринларини яратиш билан бир қаторда Caterpillar ишлаб чиқаришни йўлга қўйиш ишлаб чиқарилаётган техникаларни маҳаллийлаштириш бўйича кенг кўламли ва чуқур дастурни назарда тутади. Шу боис Zeppelin концерни бошқаруви раиси Франк Янас ўз нутқида бу жиҳатга батафсил тўхталиб ўтди:
«Тошкентда янги ишлаб чиқариш майдончаси очилиши билан SAT техникасини маҳаллийлаштириш бошланади. Машиналарни импорт қилишдан ташқари, маҳаллий бутловчи қисмларни қўшиб йиғамиз. Бу маҳаллий аҳоли учун қўшимча иш ўринлари яратибгина қолмай, нафақат Ўзбекистон, балки бутун Марказий Осиё минтақаси учун рақобатбардош техникани яратади».
Янги завод ишини экскаваторлар ва фронтал юклагичларни йиғишдан бошлаш режалаштирилган бўлиб, ривожланишнинг кейинги босқичларидаёқ тоғ-кон ва қишлоқ хўжалиги техникаларини ишлаб чиқариш ўзлаштирилади. Шунга мувофиқ, тарқатиш ва хизмат кўрсатиш тармоғини кенг кўламли кенгайтириш режалаштирилган: хизмат кўрсатиш марказлари сони ҳозирги 5 тадан 12 тага кўпайтирилиб, республиканинг барча йирик ҳудудларини қамраб олади.
Реклама ҳуқуқи асосида.
Изоҳ (0)