Халқ таълими вазирлиги «Халқ таълими тасарруфидаги таълим ташкилотларида соғлом овқатлантириш тизимини янада такомиллаштириш тўғрисида»ги Вазирлар Маҳкамаси қарори лойиҳасини муҳокамага қўйди.
Ҳужжат билан Халқ таълими вазирлиги ва Соғлиқни сақлаш вазирлигининг 2022/2023-ўқув йилидан бошлаб, Қорақалпоғистон Республикаси халқ таълими вазирлиги, Тошкент шаҳар Халқ таълими бош бошқармаси ҳамда вилоятлар халқ таълими бошқармалари тасарруфидаги умумий ўрта таълим мактаблари, барча турдаги мактаб-интернатлари, Меҳрибонлик уйларида аутсорсинг усулида соғлом овқатлантиришни ташкил этиш тўғрисидаги таклифига розилик берилиши мумкин.
Белгиланишича:
- таълим ташкилотларида аутсорсинг усулида соғлом овқатлантириш Қорақалпоғистон Республикаси халқ таълими вазирлиги, Тошкент шаҳар халқ таълими бош бошқармаси ва вилоятлар халқ таълими бошқармалари томонидан ўтказиладиган харид қилиш тартиб тамойиллари натижаларига кўра ташкил қилинади;
- таълим ташкилотида овқатлантириш аутсорсинг усулида ташкил этилганда, ижара шартномаси доирасида ауцорсерга вақтинча фойдаланишга бериладиган ошхонанинг ишлаб чиқариш ва овқатланиш хоналари, асбоб-ускуналари, идиш-товоқлари ва мебелидан фойдаланганлик учун тўлов «нол» ставка бўйича белгиланади ва улардан самарали фойдаланиш, сақланиши ва бутлиги ауцорсерга юкланади.
- таълим ташкилотларидаги озиқ-овқат маҳсулотлари ва тайёрланаётган таомлар, шунингдек, уларда фойдаланиладиган технологик жиҳозларнинг санитария қоидалари, нормалари ва гигиена нормативларига мослиги, ошхона ходимлари томонидан санитария-гигиена талаблари бажарилишига риоя этилишини аниқлаш юзасидан санитария ҳолати ўрганиб бориш ҳамда назорат қилишини ташкил этсин;
- бир ой муддатда Соғлиқни сақлаш вазирлиги, Санитария-эпидемиологик осойишталик ва жамоат саломатлиги хизмати, Халқ таълими вазирлиги билан биргаликда ўқувчиларнинг физиологик ёшига мувофиқ озиқ-овқат маҳсулотларига қўйиладиган талабларни инобатга олган ҳолда, уларни рационал кунлик овқатлантириш меъёрларини ишлаб чиқади ва тасдиқлайди.
Эслатиб ўтамиз, Қорақалпоғистон ва Хоразм вилоятида 2022 йил 1 апрелидан бошлаб мактаблардаги 1—4-синф ўқувчиларини бепул овқат билан таъминлаш тизими жорий этилган. Февраль охирларида Шавкат Мирзиёев Мўйноққа ташрифи давомида мактабларда бошланғич синф ўқувчиларига бепул овқат берилиши ҳақида гапирган эди.
«Уйига олиб кетишса ҳам, майли. Еса, кучли бўлса, соғлиғи тикланса бўлди. Насиб қилса, пулимиз кўпайгандан кейин уйларига ҳам қилиб берамиз. Бу ҳам ‘Қорақалпоғистон тажрибаси’ бўлди. Буни энди бошқа вилоятларда йўлга қўямиз. Ҳали юқори синф ўқувчиларига ҳам бу нарсани жорий этамиз», — деган эди президент.
Изоҳ (0)