Голливуднинг машҳур комик актёри Жим Керри кинодаги фаолиятини якунлаганини эълон қилди. Шу муносабат билан минглаб киноихлосмандлар қалбидан муносиб жой эгаллаган актёр иштирокидаги энг яхши фильмларни ёдга оламиз.
Стенли Ипкисс / Локи, «Ниқоб»
Чак Расселлнинг ушбу фильми Жим Керрига катта шон-шуҳрат келтирди. Қизиғи шундаки, дастлаб машҳур комиксга асосланган картинани даҳшатли фильм сифатида суратга олиш режалаштирилган. Аммо бирданига ҳаммаси ўзгарди: бош қаҳрамон Стенлининг қиёфаси — бесўнақай, фантастик ва кулгили — бу жанрга тўғри келмаслиги аён бўлди. Фильмда Жимми нафақат актёрлик истеъдодини, балки бажараётган ишига ўзига хос ёндашувини ҳам кўрсата олди. Масалан, Керри қаҳрамони – Локк руҳига кутилмаган ва фантастик кўриниш бериш учун «кўндаланг тиш»дан фойдаланган. Актёрнинг илтимосига кўра, у ёрқин сариқ костюм кийган. Жиммининг юз ифодалари шу қадар ифодали эдики, режиссёрлар резина ниқобдан воз кечиб, фақат гримдан фойдаланган. Чиройли рақсга тушадиган, эпчиллик билан ўқлардан қочиб, турли мультфильм қаҳрамонларининг қиёфасига кира оладиган, хушчақчақ, кулгили ва ғайриоддий қаҳрамоннинг ҳаракатларини шунчаки томоша қилиб бўлмайди.
Ллойд Крисмас, «Аҳмоқ ва анқов»
Ака-ука Фаррелли томонидан суартга олинган мазкур комедияда Жим Керри омадсиз Ллойд Крисмас ролини ўйнайди. У ҳайратланарли даражада кулгили қаҳрамон ва у кадрда пайдо бўлганидан фильм охиригача томошабин ўзини кулгидан тўхтата олмайди. Дўсти билан бирга кулгили ва аҳмоқона вазиятларга тушиб қолган гўл одамнинг образи табассум ва бироз ҳамдардлик туйғусини ҳам уйғотади.
Аввалига Ллойд ролига Мартин Шорт ва Стив Мартин таклиф қилинган. Бу актёрларни омадсиз қаҳрамон ролида тасаввур қилиш қийин. Айтганча, бу фильмда ҳам актёр ўзининг ижодий ёндашувига содиқ қолади: образига ўзига хос жиҳатларни беришни унутмади. Айнан шу фильмда Жим девордаги эски газетани ўқиркан «Йўқ, бундай бўлиши мумкин эмас. Биз, Ойга қўнибмиз!» дея ҳазил қилади.
«Эйс Вентура: Уй ҳайвонлари детективи»
Том Шедяк режиссёр бўлган ушбу фильмда Жим Керри ўзининг экстравагант чиқишлари ва ҳазиллари билан бошқаларнинг сабр-тоқатини тўлдирадиган ноодатий хусусий детектив ролини ўйнайди. Вентура, айниқса, жиноятчиларни жонидан тўйдириб юборади. Зукко ва синчков детектив ҳатто ўтда ёнмайди, сувда чўкмайди. Футбол жамоаси тимсоли — Қорпарча исмли дельфинни ўғирлаган ёвуз одамларнинг барча интригаларига Жим Керрининг қаҳрамони ақл бовар қилмайдиган зукколик билан жавоб беради. Адолат ғалаба қозонганда эса у фильмдаги доимий дўсти — маймунга ўхшаб қолади. Айтишларича, мазкур ролидан кейин Жим Керри маймуннинг барча қилиқларини ўрганиб олган ва бошқа комедияларда ҳам муваффақиятли фойдаланган.
Граф Олаф, «Лемони Сникет: 33 бахтсизлик»
Бред Силберлинг режиссёрлик қилган фильмда аввалги Жим Керри — кулгили ва эксцентрик одамни кўрмаймиз. Ушбу картинада унинг қаҳрамони Граф Олаф — маъюс ва даҳшатли тип сифатида тасвирланади, унинг характерида кулгидан асар ҳам йўқ. Фильмда одам қиёфасидаги йиртқич ҳайвон бечора етимларни қувиб, уларга тегишли меросни тортиб олишга уринади. Граф Олафнинг бой бўлиш истаги жирканч ва қабиҳ. Ҳеч кимга шафқат қилмайдиган бу ёвуз одам образини Жим Керри жуда ёрқин ва таъсирли тарзда ижро этган.
«Гринч — Рождество ўғриси»
Рон Ховард режиссёрлигида суратга олинган ушбу комедик фильмида ҳам актёр бошқа қиёфага кириш санъати билан томошабинларни ҳайратда қолдиришдан тўхтамайди. Яшил кўзли ярим маймунсимон жонзот — Жим Керрининг янги ҳаёлий образи. Айтганча, Гринч роли учун Эдди Мерфи ва Жек Николсон ҳам таклиф қилинган, аммо бу актёрларни бундай ғаройиб жонзот қиёфасида кўриш томошабинларнинг тасаввурига сиғмайди. Чунки фақат Жим Керригина шундай беқиёс роллар учун туғилган. Унинг Гринчи кулгили ва ачинарли. У бутун умри давомида унинг устидан кулганликлари учун шаҳар аҳолисидан қасос олиш учун уларнинг байрами — Рождествони ўғирлашга қарор қилади. Аммо Гринчни фақатгина одамлар кайфиятини бузишга тайёр ёвуз одам сифатида кўрмаймиз. Аслида Гринч — кулгили ва меҳрибон махлуқ бўлиб, у инсонлардан илиқлик ва ҳамдардликни қидиради.
Офицер Чарли Бэйлгейц / Хенк, «Мен, яна мен ва Ирен»
Ака-ука Фарреллилар фильмида Жим Керри ўйнаган бош қаҳрамон — полициячи Чарли табиатан жуда меҳрибон одам бўлиб, ҳайртада қолган қўшниларининг кўз ўнгида безорига айланади. Қаҳрамон шахсиятида бўлиниш бошланади ва кураш жараёнида ўзини қандай тутишни билмайдиган қўпол ва такаббур — Хенк тез-тез устунлик қила бошлайди. Чарлини хафа қилганлар иккинчи «мен»нинг ғайриоддийлигидан ва раҳмдил полициячи қаёққа ғойиб бўлганидан ҳайрон. Фильм қаҳрамони таъқиблар, отишмалар, ақл бовар қилмайдиган воқеаларга дуч келади. Ҳар сонияда бир образдан иккинчисига ўтаётган Жим Керрини томоша қилиш жуда кулгили манзара. Фильмни томош қилиш асносида Голливудда ундан яхши комик йўқлигига яна бир бор амин бўласиз.
Стив Грэй, «Ақл бовар қилмайдиган Берт Андерстоун»
Дон Скардино режиссёрлик қилган мазкур комедик фильм Голливуднинг яна бир эътиборга лойиқ асари бўлиб, Жим Керри яна бир бор Стив Карелл билан бирга рол ўйнайди. Бу сафар Жим Керрига антипод ва бош қаҳрамонинг рақиби роли берилади. Кўча кўзбойлоғичи — Стив Грэй образи жуда кулгили. Жим Керрининг гипноз қилишдаги ҳаракатлари бироз беўхшов кўринса-да, аммо ҳар доимгидек томошабин кулгисига сабаб бўлади.
Эбенезер Скруж, «Рождество ҳикояси»
Режиссёр (бир вақтнинг ўзида сценарий муаллифи) Роберт Земекис, афтидан, актёрларни бироз «тежаш»га қарор қилган кўринади. Чунки бу фильмда Жим Керри бир вақтнинг ўзида бир нечта ролларни ижро этган. Дастлаб у бош қаҳрамон Эбенезер Скруж образига киради — ўзининг зиқналиги билан машҳур бўлган қари одамови, бундайлар ҳақида қишда улардан қор сўраб бўлмайди, дейишади. Кейин унинг болалиги, ўсмирлиги ва ёшлигини ҳам Жим Керри ўйнайди. Шунингдек, Скружга кўринган учта арвоҳни ҳам қўшсак, Жим Керри ушбу фильмда ижро этган ролларининг бутун арсеналига эга бўламиз. Албатта, барча образлар бир-бирига ўхшамайди. Аммо уларнинг ҳар бирида Жим Керрининг кулгили харизмасини тахмин қилиш мумкин ва у ҳар қандай томошабинни қандай кулдира олишни билади.
Изоҳ (0)