«Толибон» ҳукумати бутун Афғонистон ҳудудида кўкнори етиштиришни тақиқлади. Бу борадаги тегишли қарор ҳаракат етакчиси Ҳайбатулла Охунзода томонидан қабул қилинган, деб хабар беради «Fergana.ru».
«Толибон» етакчисининг қарорида таъкидланишича, «афғонларнинг барчаси кўкнори етиштиришга қатъий тақиқ қўйилгани ҳақида огоҳлантирилган». Бунга риоя этмаган шахслар шариат қонунлари бўйича суд қилинади, аниқланган ҳосил эса зудлик билан йўқ қилинади.
Шунингдек, Охунзоданинг қарори билан «барча турдаги гиёҳвандлик моддалари, таркибида гиёҳвандлик моддалари бор таблетка ва алкоголь маҳсулотларидан фойдаланиш, уларни ташиш, сотиш, экспорт ҳамда импорт қилиш» тақиқланган. Афғонистонда жойлашган барча гиёҳванд моддалар ишлаб чиқарувчи корхоналар ҳам тақиққа учраган.
2021 йилнинг ноябрь ойида Британиянинг The Guardian нашри кўкнори етиштириш билан шуғулланувчи айрим афғон фермерларидан интервью олганди. Нашр томонидан суҳбатлашилган афғонлар мамлакатнинг янги ҳукумати опиум етиштиришни ҳеч қачон тақиқламаслигига ишонч билдирганди.
«Опиум бўлмаганида толиблар Афғонистоннинг олдинги ҳукуматига қарши урушни молиялаштира олмаган бўларди», — деган эди гиёҳванд моддалар билан савдо қилувчи Аҳмад Хон исмли шахс. Шунингдек, у «Толибон» опиум ишлаб чиқаришни тақиқласа, бу фермерлар, наркобаронлар ва жамоатчилик томонидан салбий қаршиланишини айтган.
Эслатиб ўтамиз, август охирларида «Толибон» ҳаракати Афғонистонда ҳокимият тепасига келгач, мамлакатнинг гиёҳванд моддалари етиштиришни тўхтатиши ҳақида ваъда берганди. «Энди гиёҳванд моддалар ишлаб чиқарилмайди ва контрабанда йўли билан бошқа давлатларга олиб ўтилмайди. Афғонистон афюн етиштирадиган мамлакат бўлмайди», — деган ҳаракат вакили Забиҳулла Мужоҳид. У шундай сиёсат олиб бориш учун «Толибон»га хориж давлатларининг кўмаги зарурлигини ҳам таъкидлаган.
Изоҳ (0)