Фарғонада маст ҳолатда онасини уриб, унинг ўлимига сабабчи бўлган ўғилга суд ҳукми ўқилди. Бу ҳақда «Севимли» телеканалининг «Замон» информацион дастурида маълум қилинди.
Марғилон шаҳрида яшовчи Собиров руҳияти бузилгани сабабли 2011 йилдан буён шаҳар асаб касалликлари шифохонасида «Д» назоратига олинган, муомалага лаёқатсиз деб топилган. Маълум қилинишича, фуқаро Собирова (1961 йилда туғилган) ўғли билан 2008 йилдан бери бирга яшаб келган. Ўғил онаси билан яшаб келиш асносида фуқаро Қўзиева билан шаръий никоҳдан ўтгани, уни бир неча бор уйга олиб келгани ва мунтазам спиртли ичимликлар истеъмол қилиб келгани сабаб оилада тез-тез келишмовчиликлар содир бўлиб турган.
2021 йилнинг 30 сентябрь куни соат 20:00 ларда Собиров маст ҳолда яшаш хонадонига келган ва онаси билан жанжаллашган. Жаҳли чиққан ўғил онасининг кўзи ва елка соҳаларига бир неча бор урган. Оқибатда аёл воқеа жойида вафот этган. Шундан сўнг ўғил синглисига онасини уриб ўлдириб қўйганини айтиб, яшаш хонадони калитларини берган ва хабар олиб қўйишини сўраган. Аёлнинг қизи Тешабоева эса бу ҳақда Тошлоқ тумани ИИБга хабар берган.
Жиноят ишлари бўйича Марғилон шаҳар судида кўриб чиқилган жиноят иши доирасида фуқаро Собиров Жиноят кодексининг 97-моддаси (қасддан одам ўлдириш) 2-қисми билан айбли деб топилган.
Таъкидланишича, айбланувчи Собиров бундан аввал ўз отасининг ўлимига сабабчи бўлиб, Марғилон судининг 2016 йил 9 февралдаги ҳукмига кўра Жиноят кодексининг 104-модда (қасддан баданга оғир шикаст етказиш) 3-қисми «д» банди билан тўққиз йилга озодликдан маҳрум этилган.
Бу сафар эркакка узил-кесил 18 йилга озодликдан маҳрум қилиш жазоси тайинланган. Жазо қаттиқ тартибли колонияда ўташи белгиланган.
Аввалроқ Тошкент вилоятида ўғил онаси билан спиртли ичимлик ичиб ўтирган шахсни калтаклаб, ўлдириб қўйгани, Навоийда акасини кетмон билан уриб ўлдириб қўйган ука 5 йилга қамалгани тўғрисида хабар берилганди.
Изоҳ (0)