Бутунжаҳон бокс ташкилоти (WBO), Халқаро бокс федерацияси (IBF), Бутунжаҳон бокс кенгаши (WBC), Бутунжаҳон бокс ассоциацияси (WBA) Россиядаги жангларни тан олмаслигини маълум қилди.
«Бокс оламидаги тўртта ташкилот Украинадаги вазият бўйича ўз позициясини билдириш учун бирлашмоқда. Дунё ўт очишни тўхтатишни талаб қилар экан, ташкилотларимиз ҳам Россиядаги бокс бўйича чемпионатларни тан олмасликка қарор қилди.
Бундан ташқари, биз Россия ҳудудидаги жангларни вазиятга кейинги баҳо берилмагунча тан олмаймиз ва тасдиқламаймиз», — дейилади хабарда.
Баёнотни барча тўрт ташкилот президентлари Франциско Валкарсел (WBO), Дерил Пиплз (IBF), Маурисио Сулейман (WBC) ва Жилберто Мендоса (WBA) имзолаган.
Аввалроқ Украинадаги вазият фонида Россия ва Беларусь хоккей, баскетбол ҳамда гандбол бўйича халқаро мусобақалардан четлатилганди. Унгача эса ФИФА ва УЕФА Россия футбол терма жамоалари ҳамда клубларига халқаро мусобақаларда қатнашишни тақиқлаганди. Бундан ташқари, яна бир қатор халқаро спорт ташкилотлари россиялик спортчиларга санкциялар қўллади ва Россияда ўтиши керак бўлган мусобақаларни мамлакатдан олиб қўйди.
Изоҳ (0)