Андижон шаҳар прокуратураси томонидан олиб борилаётган жиноят иши доирасида депутат ва шаҳар ҳокими Баҳром Ҳайдаровни терговга жалб қилиш мақсадида Андижон вилояти прокуратурасига тақдимнома киритилгани хабар берилганди. «Дарё» мухбири билан шу ҳақда суҳбатлашган Андижон шаҳри ҳокими буни инкор этмоқда.
«Шу кунга қадар менинг устимдан тақдимнома киритилган ёки киритилмагани бўйича ҳеч қандай маълумотга эга эмасман», — дейди шаҳар ҳокими Баҳром Ҳайдаров.Баҳром Ҳайдаров устидан тақдимнома киритилгани ҳақидаги маълумотлардан хабар топгач, шаҳар прокурори билан боғланиб, тақдимнома сабабини сўраганини, аммо прокурор ҳеч қандай тақдимнома йўқ эканини айтганини билдирмоқда.
«Шаҳар прокуратурасининг вилоят прокуратурасига юборган тақдимномаси бўйича ижтимоий тармоқлар орқали хабар топдим. Шаҳар прокурори билан боғланганимда у устимдан ҳеч қандай тақдимнома киритмаганини айтди. Тақдимномадаги ҳолатлар бўйича гапиришим учун аввал ўша тақдимномани кўришим керак. Агар изоҳ беришим керак бўлса, албатта бу бўйича изоҳ бераман, аммо аввало тақдимнома билан танишиб чиқишим керак. Президент вакили сифатида шу жойда ишлаяпман. Шу боис қўрқмасдан, ишонч билан айтаманки, бировдан бир сўм пора ёки бошқа нарса олганим йўқ. Ҳар қандай жойда ҳар қандай ҳолатда жавоб беришга тайёрман», — дейди Баҳром Ҳайдаров.
«Дарё» мухбири тақдимнома ҳақидаги маълумотга аниқлик киритиш мақсадида Халқ депутатлари шаҳар Кенгаши котибияти масъуллари билан ҳам боғланди.
Котибият масъулларининг билдиришича, котибиятга на шаҳар прокуратураси ва на вилоят прокуратураси томонидан ҳокимнинг депутатлик дахлсизлиги сўралиб, тақдимнома киритилмаган.
Изоҳ (0)