Шавкат Мирзиёев 10 февраль куни Самарқанд вилоятига ташрифи якунида ҳокимлар ва сектор раҳбарлари иштирокида йиғилиш ўтказди. Бу ҳақда Президент матбуот хизмати хабар қилди.
Қайд этилишича, танқидий руҳда ўтган йиғилишда шаҳар ва туманлардаги долзарб иқтисодий-ижтимоий масалалар кўрсатиб ўтилган. Айрим ҳокимлар порахўрлик, таниш-билишчиликка йўл қўйган, одамлар дардига бееътибор бўлган. Зарур маблағлар ажратилган бўлса-да, ичимлик суви, иссиқлик ва электр таъминотини яхшилаш ишлари суст ташкил этилган.
Сув тежовчи технологиялар жорий қилиш учун ажратилган субсидия маблағлари мақсадсиз ишлатилган. Вилоят банкларида муаммоли кредитлар ҳажми ортган, кредитларни нотўғри ажратиш, имтиёзли кредитларга мўлжалланган маблағларни талон-тарож қилиш ҳолатлари аниқланган. Йўл-транспорт ҳодисалари, жиноятлар сони ошган.
Ўз фаолиятида масъулиятсизликка, жиддий хато ва камчиликларга йўл қўйгани учун бир қатор туман ҳокимлари, ҳудудий идоралар раҳбарлари вазифасидан озод қилинган. Камчиликларни бартараф этиб, тадбиркорликни ривожлантириш, маҳаллалар фаровонлигини ошириш бўйича кўрсатмалар берилган.
«Марраларимиз жуда юқори, халқимиз биздан амалий натижалар кутяпти. Мана, бугун 10 та раҳбарни ишдан олдим. Бундан буён ишламаган раҳбарларга чора жуда қаттиқ бўлади. Бундан ҳамма хулоса қилиши керак», — деган давлат раҳбари йиғилиш якунида.
Шу билан президент Самарқанд вилоятига ташрифини якунлаб, Тошкентга қайтиб келган.
Изоҳ (0)