«Ўзбекнефтгаз» акциядорлик жамияти бошқарув раиси Меҳриддин Абдуллаев Ўзбекистон енгил атлетика федерациясига раис этиб сайланди. Бу ҳақда Миллий олимпия қўмитаси хабар қилди.
Қайд этилишича, 8 февраль куни Миллий Олимпия қўмитаси мажлислар залида Ўзбекистон енгил атлетика федерациясининг навбатдан ташқари ҳисобот-сайлов конференцияси бўлиб ўтган. Унда Рустам Шоабдураҳмонов бошчилигидаги МОҚ раҳбарияти, Туризм ва спорт вазирининг ўринбосари Шаҳрулло Маҳмудов, Ўзбекистон спорт фахрийлари кенгаши раиси Баҳодир Маҳситов, Ўзбекистон енгил атлетика федерацияси Ижроия қўмитаси аъзолари, ушбу спорт тури мутахассислари иштирок этган.
Конференцияда Ўзбекистон енгил атлетика федерацияси раиси Андрей Абдуҳакимовнинг лавозимидан озод этиш ҳақидаги аризаси делегатлар томонидан қаноатлантирилган. Шундан сўнг, федерация раҳбарлигига «Ўзбекнефтгаз» бошқарув раиси Меҳриддин Абдуллаев номзоди илгари сурилган. Иштирокчилар ушбу номзодни бир овоздан маъқуллаган ва Меҳриддин Абдуллаев Ўзбекистон енгил атлетика федерациясининг раиси этиб сайланган.
Меҳриддин Абдуллаев 1969 йил Бухоро вилояти Жондор туманида туғилган. Мутахассислиги — иқтисодчи, ҳуқуқшунос. Ўзбекистон Республикаси Молия вазирлиги, Бухоро вилояти ҳокимлиги, Ўзбекистон Миллий банки ва Ўзбекистон Республикаси Ҳисоб палатасида турли раҳбарлик лавозимларида фаолият юритган.
Эслатиб ўтамиз, Меҳриддин Абдуллаев 2021 йил март ойидан буён «Бунёдкор» футбол клуби президенти ҳисобланади.
Изоҳ (0)