“O‘zbekneftgaz” aksiyadorlik jamiyati boshqaruv raisi Mehriddin Abdullayev O‘zbekiston yengil atletika federatsiyasiga rais etib saylandi. Bu haqda Milliy olimpiya qo‘mitasi xabar qildi.
Qayd etilishicha, 8-fevral kuni Milliy Olimpiya qo‘mitasi majlislar zalida O‘zbekiston yengil atletika federatsiyasining navbatdan tashqari hisobot-saylov konferensiyasi bo‘lib o‘tgan. Unda Rustam Shoabdurahmonov boshchiligidagi MOQ rahbariyati, Turizm va sport vazirining o‘rinbosari Shahrullo Mahmudov, O‘zbekiston sport faxriylari kengashi raisi Bahodir Mahsitov, O‘zbekiston yengil atletika federatsiyasi Ijroiya qo‘mitasi a’zolari, ushbu sport turi mutaxassislari ishtirok etgan.
Konferensiyada O‘zbekiston yengil atletika federatsiyasi raisi Andrey Abduhakimovning lavozimidan ozod etish haqidagi arizasi delegatlar tomonidan qanoatlantirilgan. Shundan so‘ng, federatsiya rahbarligiga “O‘zbekneftgaz” boshqaruv raisi Mehriddin Abdullayev nomzodi ilgari surilgan. Ishtirokchilar ushbu nomzodni bir ovozdan ma’qullagan va Mehriddin Abdullayev O‘zbekiston yengil atletika federatsiyasining raisi etib saylangan.
Mehriddin Abdullayev 1969-yil Buxoro viloyati Jondor tumanida tug‘ilgan. Mutaxassisligi — iqtisodchi, huquqshunos. O‘zbekiston Respublikasi Moliya vazirligi, Buxoro viloyati hokimligi, O‘zbekiston Milliy banki va O‘zbekiston Respublikasi Hisob palatasida turli rahbarlik lavozimlarida faoliyat yuritgan.
Eslatib o‘tamiz, Mehriddin Abdullayev 2021-yil mart oyidan buyon “Bunyodkor” futbol klubi prezidenti hisoblanadi.
Izoh (0)