Қашқадарё вилояти Китоб туманида 28 январь куни эсган кучли шамол кўп қаватли уйларга ҳам зарар берган, деб хабар бермоқда «Дарё» мухбири.

Қайд этилишича, кучли шамолдан Китоб туманининг «Гулистон» маҳалла фуқаролари йиғини ҳудудида жойлашган кўп қаватли уйлар ҳам зарар кўрган.

«Бугунги шамолдан кўп қаватли уйларга ҳам зиён етган. ‘Дом’нинг томи учиб кетди», — дейди бу ҳақда «Дарё»га хабар қилган Аъзам Аҳмадов.

Китоб тумани ҳокимлиги ахборот хизмати раҳбари Қаҳрамон Оқилов видеодаги ҳолатни тасдиқлар экан, муаммо шахсан ҳоким назоратига олинганини қўшимча қилди.

«Ҳақиқатан ҳам бугунги кучли шамол оқибатида ‘Гулистон’ маҳалласи Гулистон кўчасидаги тўрт қаватли 40 хонадонли уй томининг жами 900 квадрат метр қисми зарарланган бўлиб, асосан 2 та хонадоннинг том қисмидаги қурилиш материаллари учган. Аммо туман уй-жой коммунал хизмат кўрсатиш бўлими масъуллари уйнинг очиқ қолган томига селлофон ётқизиб, ёмғирдан сақлаш ишларини амалга оширди», — дейди Қаҳрамон Оқилов.

Туман ҳокимлиги ахборот хизмати раҳбарининг қўшимча қилишича, 29 январь куни туман ҳокими Алишер Зокиров бошчилигидаги масъуллар «Гулистон» маҳалласида бўлиб, томи учган кўп қаватли уйни кўздан кечиради.

«Ҳоким бошчилигидаги масъуллар муаммони жойига бориб ўрганиб, аҳолига ёрдам кўрсатишни мақсад қилишган», — дейди ҳокимликнинг масъул ходими.