Ўзбекистонда 2022—2026 йилларда вилоят, туман ва шаҳар ҳокимларининг асосий вазифаси мактаб таълими сифатини ошириш, келгуси беш йилда мактабларда қўшимча 1,2 миллион ўқувчи ўрни яратиш ҳамда дарсликларни янгилашдан иборат бўлади. Бу ҳақда Шавкат Мирзиёев бошчилигида ўтказилаётган йиғилишда маълум қилинди, деб хабар бермоқда «Дарё» мухбири.

Қайд этилишича, бу борада 2022 йилда дарсликларни янгилашга ажратилаётган 600 миллиард сўмдан самарали фойдаланиш зарур.

Вилоят ҳокимлари Мактабгача таълим вазирлиги билан бирга, барча ҳудудларда давлат ва хусусий боғчаларни кўпайтириш орқали мактабгача таълимнинг қамров даражасини 67 фоиздан 80 фоизга етказиши керак.

2022 йилдан бошлаб, олий таълим, халқ таълими ва мактабгача таълим вазирлари қурилиш-таъмирлаш ишлари билан шуғулланмаслиги, қурилиш ишлари билан жойларда ҳокимликлар шуғулланиши айтилган.

«Бу вазирликларнинг асосий вазифаси ёш авлодга сифатли таълим-тарбия, маърифат ва маданият бериш бўлади», — дейди президент. Айни масалада бош вазир бир ой муддатда ушбу талабни амалга ошириш бўйича тегишли қарор лойиҳасини киритиши белгиланган.

Шунингдек, Олий таълим вазирлиги келгуси беш йилда камида 10 та олийгоҳни нуфузли халқаро рейтингларга киришини таъминлаши шартлиги, вилоят ҳокимлари хусусий шериклик асосида 100 минг ўринли талабалар турар жойларини барпо этиши зарурлиги маълум қилинган.