Энергетика вазирлиги 26 январь соат 12:00 ҳолатига кўра республика ҳудудларида электр энергияси таъминоти билан боғлиқ ҳолат юзасидан маълумот берди.
Фото: «Дарё» / Мадина Нурман
Қорақалпоғистон Республикаси — барча туман ва шаҳарларида электр таъминоти мавжуд.
Андижон вилояти — Андижон шаҳар 70 фоиз, Хонабод 100 фоиз, қолган барча туман ва шаҳарларда 10 фоиз электр таъминоти мавжуд.
Бухоро вилояти — Вобкент, Шофиркон туманлари 20 фоиз, Қоракўл тумани 80 фоиз, Ғиждувон тумани 5 фоиз, Олот, Жондор, Ромитон, Пешку, Қоравулбозор, Когон, Бухоро туманлари 100 фоиз, Бухоро, Когон шаҳарлари 100 фоиз электр таъминоти мавжуд.
Жиззах вилояти — Барча шаҳар ва туманлар марказлари ва асосий тиббиёт муассасаларига 5 фоиз электр таъминоти берилган.
Қашқадарё вилояти — Қарши шаҳар 80 фоиз, қолган барча туман ва шаҳарларда 5 фоиз электр таъминоти мавжуд.
Навоий вилояти — Нурота, Хатирчи туманлари 70 фоиз, Кармана, Қизилтепа, Навбахор туманлари 80 фоиз, Зарафшон, Учқудуқ шаҳарлари 95 фоиз, Конимех, Томди туманлари 100 фоиз, Навоий шаҳар 100 фоиз электр таъминоти мавжуд.
Наманган вилояти — Наманган шаҳри 75 фоиз, Мингбулоқ тумани 70 фоиз, Косонсой тумани 65 фоиз, Норин тумани 75 фоиз Поп тумани 60 фоиз, Тўрақўрғон тумани 60 фоиз, Уйчи тумани 70 фоиз, Учқўрғон тумани 75 фоиз, Чорток тумани 30 фоиз, Чуст тумани 70 фоиз, Янгиқўрғон тумани 75 фоиз, Наманган тумани 75 фоиз электр таъминоти мавжуд;
Самарқанд вилояти — Нарпай тумани 30 фоиз, Самарқанд туман 60 фоиз, Каттақўрғон тумани 10 фоиз, Каттақўрғон шаҳри 50 фоиз, Самарқанд шаҳар 90 фоиз электр таъминоти мавжуд
Сурхондарё вилояти — Денов, Сариосиё, Узун туманлари ва Денов шаҳри 100 фоиз, Термиз шаҳри 100 фоиз, Термиз туман 70 фоиз, Шеробод тумани 15 фоиз, Олтинсой тумани 70 фоиз, Шўрчи, Бойсун, қумқўрғон туманлари 10 фоиз, Ангор, Мизробод, Жарқўрғон, Қизириқ, Бандихон туманлари 5 фоиз электр мавжуд.
Сирдарё вилояти — Сайхунобод 68 фоиз, қолган туман ва шаҳарларда 100 фоиз электр таъминоти мавжуд таъминоти мавжуд.
Тошкент вилояти — Ангрен шаҳар 10 фоиз, Бекобод шаҳар 40 фоиз, Нарафшон шаҳар 50 фоиз, Олмалиқ шаҳар 60 фоиз, Чирчиқ 50 фоиз, Оҳангарон шаҳар 50 фоиз, Бекобод туман 40 фоиз, Бўстонлик тумани 40 фоиз, Зангиота тумани 40 фоиз, Қибрай тумани 60 фоиз, Оҳангарон тумани 50 фоиз, Паркент тумани 70 фоиз, Тошкент тумани 60 фоиз, Ўрта Чирчиқ 20 фоиз, Юқори Чирчиқ тумани 70 фоиз, Чиноз 10 фоиз, Янгийўл туман 5 фоиз электр таъминотига уланган.
Фарғона вилояти — Данғара тумани 50 фоиз, Фарғона тумани 70 фоиз, Ўзбекистон тумани 50 фоиз, Риштон тумани 50 фоиз, Бувайда тумани 40 фоиз, Қўқон шаҳар 100 фоиз, Тошлоқ тумани 50 фоиз, Марғилон шаҳар 50 фоиз, Қўштепа тумани 40 фоиз, Боғдод тумани 50 фоиз, Олтариқ тумани 50 фоиз, қолган туман ва шаҳарларида 100 фоиз электр таъминоти мавжуд.
Хоразм вилояти — Барча туман ва шаҳарларида электр таъминоти мавжуд.
Тошкент шаҳри — Барча туман ва шаҳарларида электр таъминоти мавжуд.
Аввалроқ Энергетика вазирлиги умумтизимда кузатилган йирик носозликлар босқичма-босқич бартараф этилиб, Ўзбекистоннинг ягона электр тармоғига қувват узатиш бошланганини, энерготизимда кузатилган носозликлар сабабли юзага келган муаммоларни бартараф этиш учун барча чоралар кўрилаётганини маълум қилганди. Шунингдек, вазирлик хонадонлардаги ортиқча электр жиҳозларини тармоққа уламасликни сўради.
Таъкидланишича, юзага келган носозликлар сабабли мамлакатдаги мавжуд газ қазиб олиш конлари ва уни қайта ишлаш заводларида технологик жараёнларнинг бузилиш ҳолатлари кузатилмоқда. Бу эса ўз навбатида газ ишлаб чиқариш ҳажмининг камайишига олиб келмоқда. Шу сабабли иссиқлик электр станцияларида газ босимининг камайиши кузатилмоқда ва бу электр энергиясини ишлаб чиқариш ҳажмига салбий таъсир кўрсатяпти.
Бундан ташқари, ишлаб чиқариш корхоналари ва аҳолига газни етказиб бериш мақсадида 26 январдан автомобилларга газ тўлдириш станциялари фаолиятига вақтинчалик чекловлар киритилиши, юридик истеъмолчиларга ҳам табиий газ етказиб бериш тўхтатилиши маълум қилинди.
«Ўзбекнефтгаз» матбуот хизматининг маълум қилишича, электр энергия таъминоти қайта тиклангандан сўнг, нефть ва газ қазиб чиқариш ва қайта ишлаш бошқарма ва заводлардаги мавжуд технологик қурилмалар ва сиқув компрессор станцияларни босқичма-босқич ишга тушириш ишлари олиб борилмоқда.
Жумладан, Қашқадарё вилоятида жойлашган «Муборак нефть ва газ қазиб чиқариш бошқармаси», «Шўртан нефть ва газ қазиб чиқариш бошқармаси», «Муборак газни қайта ишлаш заводи» ва «Шўртан газ кимё мажмуаси» МЧЖ, Бухоро вилоятида жойлашган «Газли нефть ва газ қазиб чиқариш бошқармаси» ва «Бухоро нефтни қайта ишлаш заводи» МЧЖ фаолиятини давом эттира бошлади.
Газли ҳамда Муборак нефть ва газ қазиб чиқариш бошқармасига қарашли конлардан табиий газ қазиб чиқариш ишлари қайта давом эттирилмоқда.
