АҚШда занглаган қувур линиясидан 1,1 млн литр дизель ёнилғиси сувга тўкилди

Американинг Луизиана штати Ню-Орлеан шаҳри яқинида коррозияга учраган Meraux Pipeline қувур линиясида авария юз берди, оқибатда 1,1 миллиондан ортиқ дизель ёнилғиси сувга тўкилди. Бу ҳақда Associated Press хабар берди.

Қайд этилишича, ҳодиса экологик ҳалокатга айланган — ёнилғи иккита сунъий ҳовузга тўкилган, уларда юзлаб балиқлар, қушлар ва бошқа ҳайвонлар нобуд бўлган.

«Тўкилиш оқибатида 2300 та балиқ ва 100 дан ортиқ бошқа ҳайвонлар, жумладан, 39 та илон, 32 та қуш, бир қанча илонбалиқ ва кўк қисқичбақа нобуд бўлди», — дейилади ҳудуднинг Ёввойи табиат ва балиқчилик департаменти хабарида.

Бундан ташқари, яна 72 та аллигатор, 23 та қуш, 20 та илон ва 12 та тошбақа ушланиб муолажага жўнатилган.

Хабар қилинишича, 42 йиллик қувурнинг ёрилган ўрнида бир йилдан кўпроқ вақт олдин коррозия аниқланган. Бироқ яна бир текширув, гўёки коррозия унчалик ёмон эмаслигини кўрсатган ва таъмирлаш кечиктирилган.

Авариядан сўнг қувур линияси таъмирланиб, ҳозирда қайта ишга туширилган. Бундан ташқари, мулкдор компания ҳовузлардаги ёнилғини йиғиб олиш ишларини олиб борди.

«Тахминан 1,2 миллион литр дизель ёнилғиси йиғилди бунга тўкилган ёнилғи ҳам, авариядан кейин қувур ичида қолган дизель ёнилғиси ҳам киради», — дейилади компания хабарида.

Аввалроқ Калифорния соҳиллари яқинида катта миқдордаги нефть Тинч океанига чиқиб кетгани ҳақида хабар қилинганди.