Спортнинг барча турлари каби футболда ҳам ўйинчининг майдондаги «умри» унинг ёши ва жисмоний ҳолатига боғлиқ бўлиб, аксарият футболчилар 35 ёш атрофида бутсиларини михга илади. Аммо ҳар ерда бўлгани каби миллионлар ўйинида ҳам истисноли ҳолатлар учраб туради ва ёши катта ўйинчилар яшил майдонда баъзида ҳеч жабҳада ёшлардан қолишмайди. Сезиб улгурганингиздек, қуйида ана шундай қаришни хоҳламаётган юлдузлар ҳақида ҳикоя қиламиз.
Дани Алвес
Узоқ йиллар давомида «Барселона» сафида барқарор ўйин намойиш этиб, кейинчалик «Ювентус» ва «ПСЖ»да ҳам ўзининг нималарга қодирлигини кўрсатган Дани Алвес 2021 йилнинг сентябрь ойида клубсиз қолганди. У «Сан-Паулу» билан шартномани бекор қилди ва эркин агентга айланди. Шундан сўнг унга MLS ва Қатар клубларидан таклифлар бўлди. Бироқ Алвес Хавининг «Барселона»га қайтишини кутди ва яна қадрдон жамоаси сафига қўшилди.
Ҳозирча Алвес «Барселона» сафида расмий ўйинларда майдонга тушганича йўқ. Аммо унинг сайёранинг энг кўп соврин ютган футболчиси сифатида ёш таркибга ва «Хави лойиҳаси»га катта ёрдам бериши аниқ. Хави ҳам, клуб президенти Хоан Лапорта ҳам айнан шунинг учун уни жамоага қайтарди.
Пепе
Кўпчилик учун кутилмаган ҳолат бўлиши мумкин, лекин бундан 10 йиллар аввал дунёнинг манаман деган ҳужумчилари учун ҳақиқий муаммо деб қараладиган жанжалкаш ва «пихини ёрган» Пепе ҳамон футбол ўйнашда давом этмоқда. Унинг етакчилигидаги «Порту» ҳозирда Португалия чемпионатида биринчи ўринда бормоқда, 38 ёшли Пепе эса ушбу мавсумда барча мусобақалар доирасида 16 та ўйин ўтказди.
Умуман олганда Пепе ўтган йиллар давомида фақат ўзигагина хос бўлган хислатларини йўқотгани йўқ, шу билан бирга у спорт формасини ҳам ушлаб турибди. Шундай экан футбол ишқибозлари яна бир неча йил асил исми Кеплер Лаверан Лима Феррейра бўлган «кичкинтой» (Пепе) «қария»нинг ўйинидан баҳраманд бўлиши мумкин.
Андрес Иньеста
Хави билан тандемда 2010 йилларда бутун Европани титратган Иньеста 2018 йилдан бери Япониянинг «Виссел Кобе» клуби шарафини ҳимоя қилиб келмоқда. У «Барселона»ни тарк этаётган вақтида 34 ёшда эди ва гарчи уни ҳеч ким жамоадан ҳайдамаган бўлса ҳам, юқори нотада кетишга қарор қилганди. Андрес кунчиқар юртга шунчаки чўнтагини қаппайтириш учун эмас, балки янги чақирувлар учун борганини айтиб келади. Араб жамоаларининг таклифини рад этганининг ўзи ҳам бунга исбот бўла олади.
Япониядаги фаолияти давомида мамлакат Кубоги ва Суперкубогини қўлга киритган футболчи ушбу мавсумда Жей-Лигада 23 та ўйин ўтказиб, 6 та гол ва 4 та голли узатмага муаллифлик қилди. Иньеста ҳозирда 37 ёшда ва катта эҳтимол билан у ҳам Хавининг тажрибасини қўллайди.
Франк Рибери
Қаришни билмайдиган футболчилардан яна бири Франк Риберидир. «Чандиқли киши» «Бавария»даги порлоқ фаолиятидан сўнг икки мавсум давомида Италиянинг «Фиорентина»сида иккинчи ёшлигини ўтказди ва 2021/22 йилги чемпионат аввалида бошқа бир итальян жамоаси — «Салернитана»га ўтди. Ҳозирча дебютант жамоа ва Риберининг ишлари унчалик ҳам юришмаяпти. Жамоа 18-турдан кейин 8 очко билан мусобақа жадвалида сўнгги ўринда бормоқда. Рибери эса 12 та ўйин ўтказиб, ҳали гол ура олгани йўқ — атиги 2 та ассист. Шунга қарамай, унинг 38 ёшида кучли бешлик чемпионатларида тўп суришга куч топаётганига қойил қолмасдан илож йўқ.
Жанлуижи Буффон
Чамаси йигирма йиллардан бери тажрибали дарвозабон сифатида эътироф этиладиган Буффон ва унинг фаолияти ҳақида ортиқча гапиришга ҳожат йўқ. Узоқ 1995 йилда фаолиятини «Парма»да бошлаган дарвозабон «Ювентус» (икки марта) ва «ПСЖ»даги саргузаштларидан кейин яна қадрдон жамоасига қайтди. Гарчи жамоа B Серияда ҳаракат қилаётган бўлса ҳам, бу Буффоннинг репутациясига катта таъсир ўтказаётгани йўқ. Шу ойда 44 ёшни қарши оладиган Жижи 2021/22 йилги мавсумда ҳозирча 18 та ўйин ўтказиб, шундан 6 тасида дарвозаси дахлсизлигини сақлаб қолди.
Мавсум аввалида «Парма»га қайтганида, кўпчилик унинг шу жамоада қўлқопларини михга илишини тахмин қилганди. Аммо афтидан у ҳали бери катта спорт билан хайрлашмоқчи эмас кўринади. Буффон бир неча кун олдин берган интервьюсида фаолияти борасида шундай деди:
«Мексика ёки АҚШга бориб ўйнашни хоҳлардим. Бу мен истаётган тажриба, аммо кўрамиз нима бўлар экан. Келажакда мураббий бўламанми, йўқми, очиғи билмайман. Мен интиладиган нарса — бу такомиллашиш. Чемпионлар Лигасида ғалаба қозона олмаганим эса ҳамон рақобатбардош бўлишимга хизмат қилади».
Златан Ибраҳимович
Златан Ибраҳимович ҳақида гап кетганда, кўпчилик уни яхши шаробга ўхшатади. Боиси швециялик футболчининг ўйини йилдан йилга фақат яхшиланиб бормоқда. Гуллаган даврида «Аякс», «Ювентус», «Интер», «Барселона», «Милан», «ПСЖ», «Манчестер Юнайтед» каби фақат грандлар жамоаларда тўп тепган Ибра 2018 йилда, 37 ёшида камтарингина MLS’га йўл олганди. Шу тариқа Ибраҳимович бироз бўлса-да, омма эътиборидан тушади. Аммо 2020 йилнинг қишки трансферлар ойнасида у яна «Милан»га қайтди, шундан кейин Златаннинг иккинчи ёшлиги бошланиб кетди.
Бир нечта жароҳатни инобатга олмаганда Златан шу вақтдан бери миланликларнинг тўпурари ва етакчисига айланди. Бунга у билан биринчи шартнома атиги ярим йилга мўлжалланганини ва ундан кейин бир неча бор узайтирилганини далил сифатида келтириш мумкин. Унинг амалдаги шартномаси 2022 йилнинг ёзида ўз ниҳоясига етади. Бироқ Златан кўрсатаётган ўйинидан келиб чиқиб айтилса, битимнинг яна узайтирилиши ҳеч ким учун кутилмаган янгилик бўлмасди. 40 ёшли ҳужумчи Италия чемпионатининг ушбу мавсумида 11 та ўйинда майдонга тушиб, 7 та гол ва 2 та голли узатма амалга оширди. Бу ёшда бундай статистика кўрсатиш — шунчаки фантастика.
Криштиану Роналду
Ўзи ўйнаган барча жамоаларнинг афсонасига айланган Криштиану Роналду юқоридаги ҳамкасбларидан фарқли ўлароқ, даражасини пасайтиргани ёки аксинча иккинчи ёшлигини ўтказаётгани йўқ: у ҳамон бундан 10 йил олдин қандай ўйнаган бўлса, худди шу темпда ҳаракат қилишда давом этмоқда. «Реал» ва «Ювентус» билан деярли барча ютуқларга эришган футболчи ушбу мавсум аввалида «Манчестер Юнайтед»га қайтди. Ўшанда мухлислар қатори мутахассислар ҳам унинг бу қарорига шубҳа билан қараганди. Бироқ португалиялик бу каби фикрларнинг барчасини биринчи ўйинлардаёқ йўққа чиқарди.
36 ёшида «қизил иблислар»нинг жонига оро кираётган даҳо Англия чемпионатида 15 та ўйинда 8 та, Чемпионлар Лигасида эса 5 учрашувда 6 та гол урди. Шунчаки ақл бовар қилмас натижа.
Сўнгги пайтларда «Ювентус»нинг муваффақиятсизликлари Роналду номи билан боғланаётганди, бироқ у кетгач ҳам Турин клубининг ишлари унчалик юришиб кетмади, бироқ Кришнинг ўзи қаерда ва кимга қарши ўйнамасин барибир гол ураверишда давом этишини кўрсатиб қўйди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!