Qari bilganni pari bilmas. Qarishni bilmaydigan jahonning ayni damdagi eng yaxshi 7 futbolchisi

Sportning barcha turlari kabi futbolda ham o‘yinchining maydondagi “umri” uning yoshi va jismoniy holatiga bog‘liq bo‘lib, aksariyat futbolchilar 35 yosh atrofida butsilarini mixga iladi. Ammo har yerda bo‘lgani kabi millionlar o‘yinida ham istisnoli holatlar uchrab turadi va yoshi katta o‘yinchilar yashil maydonda ba’zida hech jabhada yoshlardan qolishmaydi. Sezib ulgurganingizdek, quyida ana shunday qarishni xohlamayotgan yulduzlar haqida hikoya qilamiz.

Dani Alves

Uzoq yillar davomida “Barselona” safida barqaror o‘yin namoyish etib, keyinchalik “Yuventus” va “PSJ”da ham o‘zining nimalarga qodirligini ko‘rsatgan Dani Alves 2021-yilning sentabr oyida klubsiz qolgandi. U “San-Paulu” bilan shartnomani bekor qildi va erkin agentga aylandi. Shundan so‘ng unga MLS va Qatar klublaridan takliflar bo‘ldi. Biroq Alves Xavining “Barselona”ga qaytishini kutdi va yana qadrdon jamoasi safiga qo‘shildi.

Hozircha Alves “Barselona” safida rasmiy o‘yinlarda maydonga tushganicha yo‘q. Ammo uning sayyoraning eng ko‘p sovrin yutgan futbolchisi sifatida yosh tarkibga va “Xavi loyihasi”ga katta yordam berishi aniq. Xavi ham, klub prezidenti Xoan Laporta ham aynan shuning uchun uni jamoaga qaytardi.

Pepe

Ko‘pchilik uchun kutilmagan holat bo‘lishi mumkin, lekin bundan 10 yillar avval dunyoning manaman degan hujumchilari uchun haqiqiy muammo deb qaraladigan janjalkash va “pixini yorgan” Pepe hamon futbol o‘ynashda davom etmoqda. Uning yetakchiligidagi “Portu” hozirda Portugaliya chempionatida birinchi o‘rinda bormoqda, 38 yoshli Pepe esa ushbu mavsumda barcha musobaqalar doirasida 16 ta o‘yin o‘tkazdi.

Umuman olganda Pepe o‘tgan yillar davomida faqat o‘zigagina xos bo‘lgan xislatlarini yo‘qotgani yo‘q, shu bilan birga u sport formasini ham ushlab turibdi. Shunday ekan futbol ishqibozlari yana bir necha yil asil ismi Kepler Laveran Lima Ferreyra bo‘lgan “kichkintoy” (Pepe) “qariya”ning o‘yinidan bahramand bo‘lishi mumkin.

Andres Inyesta

Xavi bilan tandemda 2010-yillarda butun Yevropani titratgan Inyesta 2018-yildan beri Yaponiyaning “Vissel Kobe” klubi sharafini himoya qilib kelmoqda. U “Barselona”ni tark etayotgan vaqtida 34 yoshda edi va garchi uni hech kim jamoadan haydamagan bo‘lsa ham, yuqori notada ketishga qaror qilgandi. Andres kunchiqar yurtga shunchaki cho‘ntagini qappaytirish uchun emas, balki yangi chaqiruvlar uchun borganini aytib keladi. Arab jamoalarining taklifini rad etganining o‘zi ham bunga isbot bo‘la oladi.

Yaponiyadagi faoliyati davomida mamlakat Kubogi va Superkubogini qo‘lga kiritgan futbolchi ushbu mavsumda Jey-Ligada 23 ta o‘yin o‘tkazib, 6 ta gol va 4 ta golli uzatmaga mualliflik qildi. Inyesta hozirda 37 yoshda va katta ehtimol bilan u ham Xavining tajribasini qo‘llaydi.

Frank Riberi

Qarishni bilmaydigan futbolchilardan yana biri Frank Riberidir. “Chandiqli kishi” “Bavariya”dagi porloq faoliyatidan so‘ng ikki mavsum davomida Italiyaning “Fiorentina”sida ikkinchi yoshligini o‘tkazdi va 2021/22-yilgi chempionat avvalida boshqa bir italyan jamoasi — “Salernitana”ga o‘tdi. Hozircha debyutant jamoa va Riberining ishlari unchalik ham yurishmayapti. Jamoa 18-turdan keyin 8 ochko bilan musobaqa jadvalida so‘nggi o‘rinda bormoqda. Riberi esa 12 ta o‘yin o‘tkazib, hali gol ura olgani yo‘q — atigi 2 ta assist. Shunga qaramay, uning 38 yoshida kuchli beshlik chempionatlarida to‘p surishga kuch topayotganiga qoyil qolmasdan iloj yo‘q.

Janluiji Buffon

Chamasi yigirma yillardan beri tajribali darvozabon sifatida e’tirof etiladigan Buffon va uning faoliyati haqida ortiqcha gapirishga hojat yo‘q. Uzoq 1995-yilda faoliyatini “Parma”da boshlagan darvozabon “Yuventus” (ikki marta) va “PSJ”dagi sarguzashtlaridan keyin yana qadrdon jamoasiga qaytdi. Garchi jamoa B Seriyada harakat qilayotgan bo‘lsa ham, bu Buffonning reputatsiyasiga katta ta’sir o‘tkazayotgani yo‘q. Shu oyda 44 yoshni qarshi oladigan Jiji 2021/22-yilgi mavsumda hozircha 18 ta o‘yin o‘tkazib, shundan 6 tasida darvozasi daxlsizligini saqlab qoldi.

Mavsum avvalida “Parma”ga qaytganida, ko‘pchilik uning shu jamoada qo‘lqoplarini mixga ilishini taxmin qilgandi. Ammo aftidan u hali beri katta sport bilan xayrlashmoqchi emas ko‘rinadi. Buffon bir necha kun oldin bergan intervyusida faoliyati borasida shunday dedi:

“Meksika yoki AQShga borib o‘ynashni xohlardim. Bu men istayotgan tajriba, ammo ko‘ramiz nima bo‘lar ekan. Kelajakda murabbiy bo‘lamanmi, yo‘qmi, ochig‘i bilmayman. Men intiladigan narsa — bu takomillashish. Chempionlar Ligasida g‘alaba qozona olmaganim esa hamon raqobatbardosh bo‘lishimga xizmat qiladi”.

Zlatan Ibrahimovich

Zlatan Ibrahimovich haqida gap ketganda, ko‘pchilik uni yaxshi sharobga o‘xshatadi. Boisi shvetsiyalik futbolchining o‘yini yildan-yilga faqat yaxshilanib bormoqda. Gullagan davrida “Ayaks”, “Yuventus”, “Inter”, “Barselona”, “Milan”, “PSJ”, “Manchester Yunayted” kabi faqat grandlar jamoalarda to‘p tepgan Ibra 2018-yilda, 37 yoshida kamtaringina MLS’ga yo‘l olgandi. Shu tariqa Ibrahimovich biroz bo‘lsa-da, omma e’tiboridan tushadi. Ammo 2020-yilning qishki transferlar oynasida u yana “Milan”ga qaytdi, shundan keyin Zlatanning ikkinchi yoshligi boshlanib ketdi.

Bir nechta jarohatni inobatga olmaganda Zlatan shu vaqtdan beri milanliklarning to‘purari va yetakchisiga aylandi. Bunga u bilan birinchi shartnoma atigi yarim yilga mo‘ljallanganini va undan keyin bir necha bor uzaytirilganini dalil sifatida keltirish mumkin. Uning amaldagi shartnomasi 2022-yilning yozida o‘z nihoyasiga yetadi. Biroq Zlatan ko‘rsatayotgan o‘yinidan kelib chiqib aytilsa, bitimning yana uzaytirilishi hech kim uchun kutilmagan yangilik bo‘lmasdi. 40 yoshli hujumchi Italiya chempionatining ushbu mavsumida 11 ta o‘yinda maydonga tushib, 7 ta gol va 2 ta golli uzatma amalga oshirdi. Bu yoshda bunday statistika ko‘rsatish — shunchaki fantastika.

Krishtianu Ronaldu

O‘zi o‘ynagan barcha jamoalarning afsonasiga aylangan Krishtianu Ronaldu yuqoridagi hamkasblaridan farqli o‘laroq, darajasini pasaytirgani yoki aksincha ikkinchi yoshligini o‘tkazayotgani yo‘q: u hamon bundan 10 yil oldin qanday o‘ynagan bo‘lsa, xuddi shu tempda harakat qilishda davom etmoqda. “Real” va “Yuventus” bilan deyarli barcha yutuqlarga erishgan futbolchi ushbu mavsum avvalida “Manchester Yunayted”ga qaytdi. O‘shanda muxlislar qatori mutaxassislar ham uning bu qaroriga shubha bilan qaragandi. Biroq portugaliyalik bu kabi fikrlarning barchasini birinchi o‘yinlardayoq yo‘qqa chiqardi.

36 yoshida “qizil iblislar”ning joniga oro kirayotgan daho Angliya chempionatida 15 ta o‘yinda 8 ta, Chempionlar Ligasida esa 5 uchrashuvda 6 ta gol urdi. Shunchaki aqlbovar qilmas natija.

So‘nggi paytlarda “Yuventus”ning muvaffaqiyatsizliklari Ronaldu nomi bilan bog‘lanayotgandi, biroq u ketgach ham Turin klubining ishlari unchalik yurishib ketmadi, biroq Krishning o‘zi qayerda va kimga qarshi o‘ynamasin baribir gol uraverishda davom etishini ko‘rsatib qo‘ydi.