«Листвяжная» кўмир кони эгаси 51 кишининг ўлимига оид иш бўйича икки ой муддатга ҳибсга олинди. У — Россиянинг энг бадавлат инсонларидан бири

Кемерова Марказий туман суди «Листвяжная» шахтасининг асосий эгаси, «СДС-Кўмир» компанияси директорлар кенгаши раиси Михаил Федяевни ноябрь охирида содир бўлган портлаш оқибатида 51 киши ҳалок бўлгани юзасидан очилган иш доирасида ҳибсга олиш қарорини чиқарди, деб хабар беради Meduza.

Федяев 14 февралга қадар қамоққа жўнатилган. У ўз айбини тан олмаган, ҳимоя тарафи суд қарори устидан шикоят киритади.

Шунингдек, суд «СДС-Кўмир» бош директори Геннадий Алексейевни, техник директор Антон Якутов ва «Листвяжная шахтаси» МЧЖ бош муҳандиси Анатолий Лобановни ҳам ҳибсга олиш бўйича қарор чиқарган.

Ишга алоқадор шахслар эҳтиётсизлик оқибатида икки ёки ундан ортиқ шахснинг ўлимига олиб келган хавфли ишлаб чиқариш объектларининг саноат хавфсизлиги талабларини бузиш ва тижорат ташкилотида ваколатларини суиистеъмол қилгани учун оғир оқибатларга олиб келганликда айбланмоқда.

Маълумотларга кўра, Федяев Forbes журналининг 2020 йил якунлари бўйича энг бадавлат россияликлар рейтингида 177-ўринни эгаллаган. Унинг бойлиги 550 миллион долларга баҳоланган. 2012 йилда журнали унинг активларини 1,2 миллиард долларга баҳолаган эди.

Федяев, Алексейев, Якутов ва Лобанов 15 декабрь куни ҳисбга олинганди. Бундан бир кун олдин шахтага Тергов қўмитаси раҳбари Александр Бастиркин ташриф буюрган. Ҳалок бўлганларнинг қариндошлари билан гаплашганидан сўнг, у «содир бўлган фожиада шахта эгаларининг ролини» аниқлаш зарурлигини маълум қилганди.

«Листвяжная»даги портлаш сўнгги 11 йил ичида Россия конларида содир бўлган энг йирик авария бўлди — бунгача 2010 йилда «Распадская» конида 91 киши ҳалок бўлганди. «Листвяжная» конида бундан аввалги йирик авария 2004 йил 28 октябрда содир бўлган, ўшанда метан портлаши натижасида 13 киши ҳалок бўлган. Шундан сўнг корхонанинг 9 нафар ходими шартли жазога ҳукм қилинган.