Kemerova Markaziy tuman sudi “Listvyajnaya” shaxtasining asosiy egasi, “SDS-Ko‘mir” kompaniyasi direktorlar kengashi raisi Mixail Fedyayevni noyabr oxirida sodir bo‘lgan portlash oqibatida 51 kishi halok bo‘lgani yuzasidan ochilgan ish doirasida hibsga olish qarorini chiqardi, deb xabar beradi Meduza.
Fedyayev 14-fevralga qadar qamoqqa jo‘natilgan. U o‘z aybini tan olmagan, himoya tarafi sud qarori ustidan shikoyat kiritadi.
Shuningdek, sud “SDS-Ko‘mir” bosh direktori Gennadiy Alekseyevni, texnik direktor Anton Yakutov va “Listvyajnaya shaxtasi” MChJ bosh muhandisi Anatoliy Lobanovni ham hibsga olish bo‘yicha qaror chiqargan.
Ishga aloqador shaxslar ehtiyotsizlik oqibatida ikki yoki undan ortiq shaxsning o‘limiga olib kelgan xavfli ishlab chiqarish obyektlarining sanoat xavfsizligi talablarini buzish va tijorat tashkilotida vakolatlarini suiiste’mol qilgani uchun og‘ir oqibatlarga olib kelganlikda ayblanmoqda.
Ma’lumotlarga ko‘ra, Fedyayev Forbes jurnalining 2020-yil yakunlari bo‘yicha eng badavlat rossiyaliklar reytingida 177-o‘rinni egallagan. Uning boyligi 550 million dollarga baholangan. 2012-yilda jurnali uning aktivlarini 1,2 milliard dollarga baholagan edi.
Fedyayev, Alekseyev, Yakutov va Lobanov 15-dekabr kuni hisbga olingandi. Bundan bir kun oldin shaxtaga Tergov qo‘mitasi rahbari Aleksandr Bastirkin tashrif buyurgan. Halok bo‘lganlarning qarindoshlari bilan gaplashganidan so‘ng, u “sodir bo‘lgan fojiada shaxta egalarining rolini” aniqlash zarurligini ma’lum qilgandi.
“Listvyajnaya”dagi portlash so‘nggi 11 yil ichida Rossiya konlarida sodir bo‘lgan eng yirik avariya bo‘ldi — bungacha 2010-yilda “Raspadskaya” konida 91 kishi halok bo‘lgandi. “Listvyajnaya” konida bundan avvalgi yirik avariya 2004-yil 28-oktabrda sodir bo‘lgan, o‘shanda metan portlashi natijasida 13 kishi halok bo‘lgan. Shundan so‘ng korxonaning 9 nafar xodimi shartli jazoga hukm qilingan.
Izoh (0)