Yettinchi “Oltin to‘p”ini qo‘lga kiritgan Messi, Angliyada eng yaxshi o‘yinchi deb topilgan Saloh va yana jarohat olgan Oston O‘runov. Eng so‘nggi sport yangiliklari

Dunyo va o‘zbek sportiga oid 30-noyabr tongining eng muhim xabarlari dayjesti bilan tanishing.

O‘zbekiston

O‘zbekiston futbol assotsiatsiyasining majlislar zalida O‘FA prezidenti Abdusalom Azizov raisligida 2021-yilgi mavsum yakunlari va keyingi yilgi mavsum rejalariga bag‘ishlangan yig‘ilish bo‘lib o‘tdi. Unda milliy chempionatimizda to‘p surayotgan klublarning bosh murabbiylari, jismoniy tayyorgarlik va ilmiy-metodik tahlil bo‘yicha mutaxassislari ishtirok etdi. O‘FA rahbari futbolchilarning betartib transferlar natijasida doimiy klublarni almashtirishi, bunda o‘sish va yuqori natija qayd etish asosiy maqsad bo‘lmayotganligini tanqid ostiga oldi. Mas’ullarga keyingi mavsumdan transferlar jarayonini qattiq nazorat ostiga olinish topshirig‘i berildi. Shuningdek legionerlarni olib kelishda ularning darajasi va saviyasiga alohida e’tibor qaratilishi kerakligi ta’kidlandi.

Abdusalom Azizov keyingi mavsumda ishtirok etadigan klublar soni o‘zgartirilmasligi, barcha rejalar reglament asosida tashkil etilishini ma’lum qildi. Yangi mavsumdan boshlab klublar uchun bir qator standartlar joriy etilishi, xususan, futbolchilar uchun jismoniy tayyorgarlikning minimal darajasi talablari belgilanishi va maydonlar holati qat’iy nazorat ostiga olinishini aytdi.

O‘zbekiston terma jamoasi 2022-yil boshida ikkita o‘rtoqlik o‘yini o‘tkazadi

Srechko Katanes qo‘l ostidagi O‘zbekiston milliy terma jamoasi yanvar-fevral oyida tashkil etiladigan yig‘in doirasida ikkita o‘rtoqlik uchrashuvida maydonga tushadi. “Oq bo‘rilar” 21-yanvar kuni Tokioda Yaponiya terma jamoasiga qarshi o‘yin o‘tkazsa, 1-fevralda BAAda Yangi Zelandiya bilan o‘ynaydi.

Oston O‘runov yana jarohat oldi

“Ufa” yarim himoyachisi Oston O‘runov RPL 16-turidan o‘rin olgan “Spartak”ka qarshi o‘yinni (1:1) muddatidan oldin yakunladi.

Futbolchi jarohati tufayli maydonni tark etishga majbur bo‘ldi. 25-daqiqada uning o‘yinni davom ettira olmasligi ma’lum bo‘lgan. Hozircha jarohatning qay darajada jiddiy ekani noma’lum.

Jahon

29-noyabr oqshomida France Football tomonidan yilning eng yaxshilari taqdirlandi. Unga ko‘ra, yilning eng muhim sovrini “PSJ” vakili Lionel Messiga nasib etdi. Messi yettinchi marta ushbu sovringa ega chiqdi va bu borada mutlaq rekordchi hisoblanadi.

Uning asosiy raqobatchisi Robert Levandovski (“Bavariya”) esa eng yaxshi hujumchi sovriniga ega bo‘ldi.

Ralf Rangnik “Manchester Yunayted” bosh murabbiyi etib tayinlandi

Germaniyalik mutaxassis “Manchester Yunayted” bosh murabbiyligi lavozimida mavsum oxirigacha faoliyat yuritadi. Undan keyin ikki yil davomida maslahatchi sifatida ishlaydi.

Rangnik 2021-yilning fevral oyidan hozirgacha “Lokomotiv Moskva” klubida sport va rivojlanish bo‘limi rahbari sifatida ishlab kelayotgandi.

Klublar o‘rtasidagi Jahon chempionatining qachon o‘tkazilishi ma’lum qilindi

FIFA klublar o‘rtasidagi Jahon chempionati sanasini tasdiqladi. Unga ko‘ra, musobaqa 2022-yilning 3—12-fevral kunlari BAAda bo‘lib o‘tadi.

Unda “Palmeyras” (Braziliya), “Chelsi” (Angliya), “Al-Hilol” (Saudiya Arabistoni), “Al-Ahli” (Misr), “Monterrey” (Meksika), “Oklend” (Yangi Zelandiya) va “Al-Jazira” (BAA)

Muhammad Saloh angliyalik muxlislar tanloviga ko‘ra yilning eng yaxshi o‘yinchisi bo‘ldi

“Liverpul” hujumchisi Angliya va Uels futbol muxlislari assotsiatsiyasi talqiniga ko‘ra 2021-yilning eng yaxshi o‘yinchisi deb topildi. Misrlik futbolchi bu sovrinni ikkinchi marta qo‘lga kiritdi. Saloh 2018-yilda ham ushbu sovringa ega chiqqandi.

Muhammad sovrin uchun kurashda Meyson Maunt (“Chelsi”), Mikail Antonio (“Vest Hem”), Fil Foden, Ruben Diash (ikkisi – “Manchester Siti”) va Yuri Tilemansni (“Lester”) ortda qoldirdi.

Neymar kamida 1,5 oyga safdan chiqdi

“PSJ” jarohatda bo‘lgan bir qator futbolchilar haqida ma’lumot berdi. “Sent-Etyenn”ga qarshi o‘yinda (3:1) Neymar chap oyoq boldir oshig‘idan jarohat olgan va uning tiklanishiga 6–8 hafta vaqt ketadi. Bir necha kundan keyin braziliyalik futbolchi yana ko‘rikdan o‘tadi va shundan keyin tiklanish jarayoni qancha vaqt olishi aniq bo‘ladi.

Shuningdek, lazaretda bo‘lgan Marko Verratti va Mauro Ikardi mashg‘ulotlarga qaytgan. Jorjinyo Veynaldum payshanba kunidan shug‘ullanishni boshlashi aytilgan. Tiklanish jarayoniga qarab, Ander Errera hafta oxirida mashqlarni boshlashi mumkin, Yulian Drakslerning tiklanishiga hali 2-3 hafta vaqt bor.