Парижда Эйнштейннинг қўлёзма қайдлари рекорд қийматда сотилди

Алберт Эйнштейннинг қўлёзма қайдлари Париждаги аукционда рекорд қийматда сотилди. Бу ҳақда Reuters агентлигига таяниб, Tengrinews хабар берди.

Christie’s кимошди уйи умумий нисбийлик назариясининг якуний версиясига элтувчи айрим қадамлар қайд этилган Эйнштейн ва унинг ҳамкасби Мишел Бессонинг қўлёзмаларини савдога қўйган.

Натижада якуний нарх экспертлар кутганидан юқори бўлиб чиқди: қўлёзмалар 13 миллион долларга сотилган. Таъкидланишича, бу марҳум олимнинг қўлёзмалари учун тўланган энг юқори нарх ҳисобланади.

«Бу, шубҳасиз, Эйнштейннинг аукционга қўйилган энг қимматли қўлёзмаси ҳисобланади. Эйнштейннинг 1919 йилгача бўлган илмий ҳужжатлари жуда кам учрайди», — дейди Christie’s вакиллари. Ҳужжатларнинг дастлабки қиймати 2,4-3,5 миллион долларни ташкил этган.

Маълум қилинишича, 54 варақли қўлёзма умумий нисбийлик назариясига асос бўлган гравитация майдони тенгламаларининг дастлабки версиясини ўз ичига олган. Ҳужжат 1913- ва 1914 йилларда Швейцариянинг Сюрих шаҳрида Эйнштейн ва Мишел Бессо томонидан ёзилган. Ҳужжатдаги ҳисоб-китоблар, шунингдек, Меркурий орбитасининг аномалиясига бағишланган — улар Эйнштейннинг назарияси олимларни узоқ вақт «боши берк кўчага» олиб кирган ҳодисани тушунтиришга йўналтирилган эди.

Christie’s маълумотларига кўра, қўлёзмада кўплаб хатолар мавжуд ва Эйнштейн уни ташлаб юборган. Бироқ Бессо ҳужжатни сақлаб қолган. Christie’s ҳужжатнинг сақланиб қолинишини «деярли мўъжиза» деб атаган.

Эйнштейн 1955 йили 76 ёшида вафот этган, олим барча даврларнинг энг буюк физик назариячиларидан бири ҳисобланади. Унинг нисбийлик назарияси физикада инқилоб содир этган. Эйнштейн 1921 йилда физика бўйича Нобель мукофотини қўлга киритган.

Эслатиб ўтамиз, 2021 йилнинг май ойида Бостондаги RR Auction аукционида физик назариётчи Алберт Эйнштейннинг E=mc2 формуласи туширилган мактуби 12 миллион долларга сотилганди.