Фақатгина тишлар учун эмас: Тиш пастасидан яна қандай мақсадларда фойдаланса бўлади?
Тиш пастаси фақатгина тишларни тозалайди деб ўйлаганлар қуйидаги маълумотлардан кейин фикрини ўзгартириши аниқ.
Заргарлик буюмларини тозалайди
Заргарлик буюмларини тозалаш учун алоҳида тозалаш воситаси сотиб олишга ҳожат йўқ. Бунинг учун бироз намланган тақинчоқ устига тиш пастаси суртиб, чўтка билан ишқаланг. Қарабсизки, натижадан кўзингиз қувнайди.
Жўмракларни «ялтиратади»
Аслида жўмракларни сирка ва сода билан ҳам «ялтиратиш» мумкин. Аммо тиш пастаси ҳам ундан кам иш бермайди. Бунинг учун нам губкага суртилган паста билан яхшилаб ишқалаш кифоя қилади.
Чинни идишдаги чой ва қаҳва
Ичимлик содаси йўқ вақтда тиш пастаси ёрдамида чинни идишдаги чой ва қаҳвадан қолган доғни кетказишингиз мумкин.
Кўзгудаги косметик воситалар доғини кетказади
Помада, тональ крем, пудрадан қолган доғни кетказиш учун паста суртилган пахтадан фойдаланинг.
Саримсоқ пиёз ва пиёз ҳидини бартараф қилади
Пичоқда қолган саримсоқ пиёз ва пиёз ҳидини бартараф қилиш учун тиш пастасини суртиб ювиш тавсия қилинади.
Мебельдаги маркердан қолган изни йўқотишга ёрдам беради
Мебельдаги маркер изини кетказиш учун пастани салфеткага суртиб артинг.
Пойабзални оқартиради
Кирланган кроссовка ёки бошқа оқ рангни пойабзални тиш пастаси ёрдамида тозаланг. Оёқ кийимингиз оппоқ ва янгидек кўринади.
