Истанбулда 12 ноябрь куни Туркий кенгаш котибиятининг янги биноси олдида байроқ кўтариш маросими бўлиб ўтди, деб хабар бермоқда Президент матбуот хизмати.
Унда Ўзбекистон Президенти Шавкат Мирзиёев ва қардош мамлакатлар раҳбарлари иштирок этган. Тантанали равишда Ўзбекистон, Озарбайжон, Туркия, Қирғизистон, Қозоғистон ҳамда Венгрия, Туркманистон ва ташкилотнинг байроқлари кўтарилган.
Хабарда айтилишича, Туркия президенти Ражаб Тоййиб Эрдўғон тадбир иштирокчиларига мурожаат қилиб, мамлакатлар ўртасидаги кўп қиррали шерикликни янада ривожлантириш муҳим эканлигини таъкидлади ҳамда ушбу котибият ташкилот мақсад ва вазифаларини амалга оширишда бундан буён ҳам муҳим ўрин тутишига умид билдирди.
Туркий кенгаш котибияти жойлашган бино XIX аср бошида барпо этилган ҳамда Истанбул шаҳрининг Фотиҳ туманида жойлашган.
Эслатиб ўтамиз, Шавкат Мирзиёев 11 ноябрь куни Туркий тилли давлатлар ҳамкорлик кенгаши саммитида иштирок этиш учун Истанбул шаҳрига келди ва шу куни ўзига ажратилган қароргоҳда Туркий тилли давлатлар ҳамкорлик кенгаши бош котиби Бағдод Амреевни қабул қилди.
Саммитнинг асосий тадбирлари 12 ноябрга мўлжалланган. Давлат раҳбари қатор икки томонлама учрашувлар ўтказиши режалаштирилган.
Изоҳ (0)