Ўзбекистонда хизмат кўрсатган фан арбоби, Ўзбекистон, Қорақалпоғистон ва Нью-Йорк академиясининг ҳақиқий аъзоси, профессор Шабат Хўжаев 98 ёшида оламдан ўтди. Бу ҳақда Инновацион ривожланиш вазирлиги хабар берди.
Шабат Хўжаев 1924 йилда Тошкент шаҳрида туғилган. 1946 йилда Тошкент тиббиёт институтининг даволаш факультетини тамомлаган. 1946 йил ноябрь ойида Собиқ Иттифоқ Тиббиёт фанлари академиясининг Эпидемиология, микробиология ва юқумли касалликлар институтига аспирантурага ўқишга қабул қилинган (Москва). Аспирантурани тамомлагач, номзодлик диссертациясини ҳимоя қилиб, 1951 йилгача шу институтда ишлаган.
1961 йилда Шабат Хўжаев Тошкент врачлар малакасини ошириш институтида юқумли касалликлар кафедраси профессори, 1962–1965 йилларда илмий-маърифий ишлар бўйича проректор лавозимларида ишлаган, 1964 йилдан эса болалар юқумли касалликлари кафедрасини ташкил этиб, 40 йил давомида унга раҳбарлик қилган.
Шабат Хўжаев 1967 йилда Ўрта Осиёда илк бор 1-клиник юқумли касалликлар шифохонасида вирусология лабораториясини яратган ва Ўзбекистонда биринчи марта грипп ва бошқа ўткир респиратор касалликлар диагностикаси учун иммунофлуорессенсия реакциясини жорий қилган. Клиник иммунологияда олиб борилган ишларнинг катта босқичи натижаси ўлароқ Москвада нашр этилган «Иммунология бўйича қўлланма» (1973) монографияси бўлди.
1979 йилда Шабат Хўжаев Д.И.Ивановский номидаги Вирусология институтининг Ўзбекистондаги филиалини тузиб, унга раҳбарлик қилган. Ўзбекистон Соғлиқни сақлаш вазирлиги Вирусология институтига асос солиб, унга 2004 йилгача раҳбарлик қилган.
Профессор Хўжаев вирусли гепатит соҳасида иш бошлаган ҳолда Ўзбекистон аҳолисини гепатит вирусига қарши оммавий эмлаш ғоясини илгари суриб, буни босқичма-босқич амалга оширган. 1990–1991 йилларда Шабат Хўжаев раҳбарлигида Вирусология илмий-тадқиқот институтида вирусли гепатит Б га қарши эмлаш дастури ишлаб чиқилган.
Бундан аввал академик Нусрат Парпиев 90 ёшида, профессор Темуржон Отақўзиев 85 ёшида, академик Ўткир Расулев 82 ёшида вафот этгани тўғрисида хабар берилганди.
Изоҳ (0)