Навоий вилоятининг Нурота туманида 6 ноябрь куни юз берган ЙТҲда 8 киши ҳалок бўлгани, уларнинг 3 нафари банк ходими экани айтилмоқда.
Фото: Telegram
«Kun.uz»нинг ёзишича, воқеа Навоий—Нурота йўлида содир бўлган. Қарама-қарши йўналишда ҳаракатланиб келаётган иккита Nexia машинаси тўқнашган. Машиналарнинг бири йўл четига ағдарилган, иккинчиси эса ёниб кетган.
Автоҳалокат оқибатида «Халқ банки» Нурота туман филиалининг бошқарувчиси Т.П. (29 ёшли), бош ҳисобчиси М.С. (40 ёшли) ҳамда мониторинг бўлими бошлиғи Ю.Р. (32 ёшли) воқеа жойида вафот этган. Ёниб кетган машинада 5 киши бўлган ва улар ҳам воқеа жойида ҳалок бўлган.
Ушбу ЙТҲ юзасидан Навоий вилояти ИИБ ЙҲХБ ҳозирча расмий маълумот бермаган.
Эслатиб ўтамиз, Ангренда 24 май куни кўлами ва қурбонлари сони бўйича Ўзбекистонда 2021 йил давомида ҳозиргача юз берган йўл-транспорт ҳодисалари орасида энг йириги юз берган эди. Ўш—Тошкент А-373 йўлининг 184-километрида Наманган—Тошкент йўналиши бўйлаб ҳаракатланаётган MAN русумли тиркамаси бор юк машинаси бошқарувни йўқотиши оқибатида камида 8 та автомобиль ўзаро тўқнашган, улардан бири ёниб кетганди.
Дастлабки хабарларда ҳодиса оқибатида 7 киши ҳалок бўлгани, яна камида 14 киши жароҳатлангани айтилганди. Агар қурбонлар сони кейинчалик 7 кишидан ортмаган бўлса («Дарё» буни аниқлашга ҳаракат қилган, аммо ваколатли органлар маълумот бермаганди), Навоийдаги авария Ўзбекистонда 2021 йилда юз берган энг кўп қурбонли йўл-транспорт ҳодисасидир.
