Экология ва атроф-муҳитни муҳофаза қилиш қўмитаси «Долзарб 40 кунлик» доирасида Ўзбекистон вилоятларида қайси турдаги дарахтлар экилиши бўйича маълумот берди, деб ёзади «Халқ сўзи online».
Хусусан, Қорақалпоғистон ҳудудига катальпа, павловния, япон сафораси, қайрағоч, тут ва акация даратлари экилади. Жиззах, Наманган, Самарқанд, Фарғона ва Тошкентда чинор, эман, заранг ва бошқа дарахтлар экилади.
Мутахассисларнинг айтишича, Ўзбекистон ҳудудларида экиш учун 27 турдаги дарахт кўчатлари таклиф этилмоқда. Жумладан, каштан, оққайин, эман, япон сафораси, шумтол, қайрағоч, павлония, терак, акация, чинор, тут, жийда, ёнғоқ, беҳи, узум, қрим қарағайи ва виргин арчаси.
Ўзбекистонда 2 ноябрдан 10 декабрга қадар дарахт экиш бўйича «Долзарб 40 кунлик» эълон қилинган. Ушбу вақт мобайнида вилоятларда бир неча миллион туп кўчатлар экиш режалаштирилган.
Эслатиб ўтамиз, Президент Шавкат Мирзиёев раислигида 2 ноябрь куни аҳолини уй-жой билан таъминлаш ҳамда яшил майдонларни кенгайтириш чора-тадбирлари муҳокамаси юзасидан видеоселектор йиғилиши ўтказилганди. Йиғилишда 10 декабрга қадар дарахт экиш бўйича «Долзарб 40 кунлик» эълон қилинган. Ўрмон хўжалиги давлат қўмитасига ҳокимлар билан бирга, ҳар бир ҳудуднинг иқлим шароитига мос кўчатларни кўпайтириш ва етказиб бериш вазифаси қўйилган эди.
Изоҳ (0)