21 октябрь куни Sinovac вакцинасининг 912 минг дозаси COVAX платформаси орқали Ўзбекистонга етиб келди, деб хабар беради ЮНИСЕФ Ўзбекистон.
Фото: ЮНИСЕФ Ўзбекистон
Эслатиб ўтамиз, 20 октябрь куни ҳам COVAX дастури доирасида Sinovac вакцинасининг 864 минг дозалик партияси олиб келинганди.
Маълумот учун, COVAX ишлаб чиқариш қувватларини шакллантиришни қўллаб-қувватлаш ва марказлашган харидларни амалга ошириш бўйича механизм ҳисобланади. Ҳозирги пайтга қадар мазкур ташаббусга 180 дан ортиқ давлат қўшилган.
Фото: ЮНИСЕФ Ўзбекистон
«ЮНИСЕФ ва ҳамкорлар COVID-19 га қарши вакциналарни Ўзбекистон халқи учун янада яқинроқ қилиш операциясида иштирок этишдан мамнун», — дейилади хабарда.
Шундай қилиб, мамлакатда эмлаш жараёнларида фойдаланилаётган жами вакцина 32 195 538 дозани ташкил қилмоқда.
Фото: ЮНИСЕФ Ўзбекистон
Фото: ЮНИСЕФ Ўзбекистон
Улардан:
- 1 594 480 дозаси AstraZeneca,
- 23 177 998 миллион дозаси ZF-UZ-VAC2001,
- 720 500 дозаси «Спутник V»,
- 3 000 060 дозаси Moderna,
- 1 726 500 дозаси Pfizer/BioNTech,
- 1 976 000 дозаси Sinovac вакцинасидир.
Эслатиб ўтамиз, Ўзбекистонга Хитойнинг коронавирусга қарши Sinovac вакцинаси келтирилиши мумкинлиги ҳақида 2021 йилнинг май ойида Коронавирусга қарши кураш штаби аъзоси Нурмат Отабеков маълум қилганди. «Жаҳон соғлиқни сақлаш ташкилотининг маълумотларига кўра, COVAX дастури доирасида Хитойнинг ‘Синофарм’ фирмасида ишлаб чиқарилган вакцина — Sinovac вакцинаси Ўзбекистонга олиб келиниши эҳтимоли бор», — деган эди у АОКАда ўтказилган брифингда. 13 октябрь куни эса Туркия ҳукумати томонидан Ўзбекистонга беғараз ёрдам сифатида COVID-19 га қарши Хитойда ишлаб чиқарилган 200 минг доза Sinovac вакцинаси олиб келинган эди.
