2021 йилнинг апрелида Тошкент вилояти Нурафшон шаҳридаги икки қаватли уйда газ портлаши натижасида бир киши ҳалок бўлганди. MY5 телеканалининг «Марказий студия» ахборот дастурида маълум қилинишича, портлашга сабабчи бўлган фуқарога нисбатан суд ҳукми ўқилган.
Аввалроқ портлаш содир бўлган хонадонда «Ҳудудгаз Тошкент» газ таъминоти филиали ходимлари иш олиб борган. Ўрганишлар жараёнида маиший эҳтиёж учун табиий газни ўғирлаш натижасида 2 қаватли бинодаги уйлардан бирининг хонасида табиий газ тўпланиши содир бўлгани аниқланган. Хонадон эгаси ҳисоблагични олиб ташлаб, газ қувурларини канализация сифони орқали улаб қўйиши табиий газ сизиб чиқишига сабаб бўлган.
Марҳумнинг онасини сўзларига кўра, қулаган плитани кўтариш учун чақирилган кран 1,5 соатда келган, бола эса ярим соат давомида тирик бўлган, ёрдамга чақирган. «ФВВнинг 20 нафар ходими келиб кўтарганида, ўғлим чиққан бўлар эди», — дейди аёл.
Таъкидланишича, пастки қаватдаги хонадон эгасига портлаш оқибатида етказилган зарарни қоплашга 200 миллион сўм ва уй ичидаги буюмлар учун яна 50 миллион сўм компенсация тўланган.
Суд ҳукмига кўра, судланувчи А.У. Жиноят кодексининг 259-модда (ёнғин хавфсизлиги қоидаларини бузиш) 2-қисми «а» ва «б» бандларида назарда тутилган жиноятни содир этганликда айбли деб топилган. Шу модда билан бир йил муддатга моддий жавобгарлик билан боғлиқ лавозимларда ишлаш ҳуқуқидан ва 3 йилга озодликдан маҳрум қилиш жазоси тайинланган. Шунингдек, судланувчидан Нурафшон шаҳар ҳокимлиги фойдасига 600 миллион сўм миқдорида моддий зарар ундирилиши белгиланган.
Аввалроқ Самарқанд вилояти Каттақўрғон туманидаги уйларнинг бирида ҳаво-газ аралашмаси портлаши содир бўлган эди. Кейинроқ Бош прокуратура ҳолат юзасидан жиноят иши қўзғатилганини билдирди. «Ҳудудгаз Самарқанд» газ таъминоти матбуот хизматининг маълум қилишича, портлаш хусусий тадбиркорлик тармоғига тегишли бўлган газ қувуридан газ сизиб чиқиш оқибатида содир бўлган.
Изоҳ (0)