Латвияда 21 октябрдан 15 ноябрга қадар бирламчи асосий эҳтиёжларни қондириш хизматларини кўрсатадиган корхоналардан ташқари барча ташкилот ва муассасалар ёпилади. Шунингдек, соат 20:00 дан 05:00 га қадар комендантлик соати жорий қилинди. Бу ҳақда мамлакат ҳукумати Twitter’да маълум қилган.
Латвиянинг LETA ахборот агентлиги хабарига кўра мамлакатда қимор ўйинлари, тотализаторлар, кўнгилочар масканлар, аттракционлар, аквапарклар, батут парклари фаолияти вақтинча тақиқланади. Шунингдек, фитнесс, спорт, жисмоний тарбия, туризм (ўзи яшайдиган манзилга қайтиш ва хориж сафарлар мустасно), фото ҳамда видео хизматлар (ҳужжатлар ҳамда ОАВ иши учун суратга олиш, тасвирга туширишга рухсат этилади) ва бошқа фаолият турларида хизмат кўрсатиш вақтинча тўхтатилади. Шахсий маслаҳат бериш хизматлари ва ов қилишга рухсат берилмаган. Кўплаб дўконлар ва ўқув муассасаларининг иши тўхтайди.
«Алоҳида ёндашув талаб этилмайдиган хўжалик хизматлари бир нафар харидорга камида 15 квадрат метр очиқ майдон тақдим этиш имкони мавжуд бўлган бинолар ҳудудида рухсат этилади», — дейилади хабарда.
Мактабларда 1—3-синфларнинг одатий шаклдаги дарсларга қайтиши 1 ноябрда амалга ошиши мумкин. Боғчаларда фақат ота-оналари ўта муҳим бирламчи эҳтиёжларни кўрсатадиган болалар учун навбатчи гуруҳларнинг ишлашига рахсат берилиши режалаштирилган.
Аввалроқ Латвия бош вазири Крушянис Кришянис коронавирус билан боғлиқ янги чекловлар бўлиши мумкинлиги ҳақида огоҳлантирганди. Жонс Ҳопкинс университети тақдим қилиб келаётган статистик маълумотларга кўра коронавирус пандемияси бошланганидан буён Латвияда 372 585 нафар одам COVID-19 билан касалланган, 5489 нафар бемор касаллик асоратлари оқибатида вафот этган. Охирги бир сутка давомида мамлакатда 2466 та янги касалланиш ҳолати қайд этилган.
Изоҳ (0)