Latviyada 21-oktabrdan qat’iy lokdaun kiritiladi. Mamlakat koronavirus tarqalishi bo‘yicha dunyoda yetakchiga aylandi

Latviya hukumati koronavirus infeksiyasining tarqalishini kamaytirishga qaratilgan qat’iy choralar kiritilishini e’lon qildi, deb yozadi Meduza.

21-oktabrdan 15-noyabrgacha eng zarur mahsulotlar bilan savdo qiluvchilaridan boshqa barcha do‘konlar yopiladi. Sport, ko‘ngilochar va madaniy tadbirlar bekor qilinadi. Sartaroshxonalar, go‘zallik salonlari va umumiy ovqatlanish muassasalari ham o‘z faoliyatini to‘xtatadi. 20:00 dan 5:00 gacha komendantlik soati amal qiladi.

Kuzgi ta’tildan keyin maktab o‘quvchilarining aksariyati masofaviy ta’limga o‘tkaziladi, 1-noyabrdan maktablarda faqat 1—3-sinf o‘quvchilari o‘qishda davom etadi. Maktabgacha yoshdagi bolalar uchun ta’lim muassasalari ota-onasi ishga boradigan bolalarni qabul qiladi.

Bundan tashqari, hukumat yig‘inlarni cheklaydi, shuningdek, turli uy xo‘jaliklaridagi odamlarning bitta avtomobilda harakatlanishini taqiqlaydi.

Latviya bosh vaziri Krishyanis Karinshning aytishicha, yangi cheklovlar Latviyada vaksinatsiya darajasi past bo‘lgani sababli kiritilgan. “Bizda bunday vaziyat, Daniya va Irlandiyada esa boshqacha vaziyat ekanligi ko‘pchilikka tushunarsiz tuyulishi mumkin. Vaksinatsiya jarayoni tegishli tarzda ketmagani bunga sabab bo‘lgan”, — dedi bosh vazir.

Qayd etilishicha, 18-oktabr holatiga ko‘ra, Latviya aholi jon boshiga COVID-19 bilan kasallanish darajasi bo‘yicha dunyoda birinchi o‘ringa chiqib olgan. So‘nggi bir hafta ichida koronavirusga chalinish bo‘yicha yangi holatlar 49 foizga ko‘paygan.

Jons Hopkins universiteti ma’lumotlariga ko‘ra, aholisi soni 1,8 millionga teng bo‘lgan Latviyada har kuni 2000 dan ortiq odamda virus aniqlanmoqda. Kasallanishning umumiy ko‘rsatkichi har 100 ming aholiga 1266,4 ga yetgan — bu ikkinchi to‘lqin chog‘idagi maksimumdan ikki karra ortiq demakdir. Latviyada favqulodda vaziyat rejimi amal qilib kelayotgan edi.

Avvalroq Latviya prezidenti Egil Levits koronavirusga chalingani xabar berilgan edi. U 2021-yil fevralida COVID-19 ga qarshi emlangan bo‘lishiga qaramay, 13-oktabr kuni Shvetsiyaga xizmat tashrifidan qaytib kelib, COVID-19 ga topshirgan ekspress-testi musbat natija bergan.

Eslatib o‘tamiz, iyulda Latviyada shifokorlar, o‘qituvchilar va mansabdorlar uchun majburiy vaksinatsiya joriy qilingan, emlanmaganlarni ishdan bo‘shatishga ruxsat berilgan edi.