Туркманистонда президент, вазирлар ва депутатлар мамлакат мустақиллигининг 30 йиллиги шарафига бир-бирини медаллар билан тақдирлади

Туркманистонда 25 сентябрь куни Халқ маслаҳати йиғилиши бўлиб ўтди. Ундан сўнг Туркманистон президенти Гурбангули Бердимуҳамедов, Вазирлар Mаҳкамаси аъзолари ва парламент раиси мустақилликни мустаҳкамлашдаги хизматлари учун бир-бирларини «Türkmenistanyň Garaşsyzlygynyň 30 ýyllygyna» (Туркманистон мустақиллигининг 30 йиллигига») медаллари ва «Altyn şaý» эсдалик тангалари билан тақдирлади, деб ёзади «Хроника Туркменистана».

Худди шу куни кўп болали оналарга «Zenan kalby» ордени топширилди, мамлакатнинг ўнлаб фахрий фуқаролари ҳам унвон ва турли орденларга эга бўлди.

20 сентябрь куни Вазирлар Маҳкамасининг кенгайтирилган йиғилишида Бердимуҳамедов мукофотга лойиқ кўрилган барча фуқароларнинг парадда тақиб юриши учун уларга 26 сентябрь куни давлат мукофотларини топширишни буюрди. 27 сентябрь куни эрталаб янги Ҳукумат мажмуасида тантанали ҳарбий парад, кечқурун эса санъат усталарининг концерти бўлиб ўтади.

«Яхши натижаларга эришган вилоятлар ва этраплар ҳокимларига келсак, уларга пахта йиғим-теримидан сўнг мукофот топшириш тўғри бўлади», — деди давлат раҳбари.

Шунингдек, 26 сентябрь куни бир қанча нуфузли меҳмонлар Туркманистон мустақиллигининг 30 йиллиги муносабати билан ўтказиладиган тантаналарда иштирок этиш учун Ашхободга келди.

Шу куни президент Гурбангули Бердимуҳамедов Туркманистонда энг йирик қурилиш шартномалари ишониб топширилган Франциянинг Боуйгуэс қурилиш компанияси раҳбари Мартин Буйгни қабул қилди. Компания парадларни қабул қилиш учун очилган янги трибунани қурган. Унга эски трибунани ишбилармонларни қабул қилиш маркази сифатида қайта қуриш топшириғи берилди.

Татаристон президенти Рустам Минниханов билан учрашувда эса икки томонлама ҳамкорлик муҳокама қилинди. Сўнг Бердимуҳамедов ўз ҳамкасбига Туркманистоннинг «Garaşsyzlyk» орденини топширди. Татаристон раҳбарининг сайтида музокаралар ҳақида хабар берилмаган.

Туркманистон раҳбари Санкт-Петербург губернатори Александр Бегловни ҳам қабул қилди. Губернаторнинг веб-сайтида хабар берилишича, Беглов бош вазир ўринбосари Сердар Бердимуҳамедов ва ташқи ишлар вазири Рашид Мередов билан учрашган. Қайд этилишича, 2021 йилда Санкт-Петербург ва Туркманистон ўртасидаги савдо айланмаси қарийб 30 фоизга ошган.

Расмий учрашувлардан сўнг Санкт-Петербург раҳбари Ашхободдаги А.С. Пушкин номидаги туркман-рус мактабига ташриф буюрди. У ерда у ўқув адабиётлари учун сертификат тақдим этди. Таъкидланишича, мактаб ўқувчиларининг 50 фоизини Россия фуқаролари, яна шунча фоизини Туркманистон, шунингдек, Ашхободдаги МДҲ мамлакатлари дипломатик ваколатхоналари ходимларининг фарзандлари ташкил этади. Умумий ҳисобда мактабда 800 дан ортиқ бола ва 70 нафар ўқитувчи бор.