Ўзбекистонда Lada автомобилларини серияли ишлаб чиқариш бошланди. Бу ҳақда Lada автомобилларининг мамлакатдаги расмий импортчиси Roodell’га таяниб, Spot хабар берди.

Фото: «Дарё» / Мадина Нурман

Йирик узелли йиғиш (ЙУЙ) усулида ишлаб чиқарилган дастлабки Lada Vesta SW ва Lada XRay моделлари ҳозирда дилерлик тармоқларига юборилиш учун тайёр. Тез орада улар қаторига Lada Largus ҳам қўшилади.

Автомобилларни йиғиш ишлари Жиззах эркин иқтисодий зонасида жойлашган ADM Jizzakh автомобиль заводида йўлга қўйилган.

«Ўзбекистон — ‘АвтоВаз’нинг муҳим экспорт бозорларидан бири ҳисобланади, Lada бренди эса республикада яхши танилган. Ҳамкорликнинг янги босқичи мижозларга замонавий автомобиллар ва сифатли сервисни тақдим этган ҳолда Lada’нинг мамлакат бозорида ривожланишини давом эттиришга имкон беради», — дейилади компания хабарида.

Маҳаллий йиғиш ишлари Lada автомобилларини истеъмолчилар учун ҳамёнбоп бўлишини таъминлайди, биринчи навбатда кредит дастурлари ва Trade-in орқали. Бундан ташқари, локал йиғиш давлат харидларида иштироки сабаб мижозлар кўламининг ортишига олиб келади.

Маълумот учун, 2020 йилда Ўзбекистонда Roodell дилерлик тармоғи орқали 5 мингдан ортиқ Lada автомобиллари сотилган.

Эслатиб ўтамиз, Ўзбекистонда Lada ва Renault автомобилларини йиғишни йўлга қўйиш режалаштирилаётгани 2020 йилнинг охирларида маълум бўлганди. Бу ҳақда 2021—2023 йилларга мўлжалланган Инвестиция дастури тасдиқланган Президент қарорида келтирилган. 2021 йилда Renault-«АвтоВАЗ» автомобиль заводи қурилиши ва ишга туширилиши кўзда тутилган.