Ўзбекистонда ҳафта охирига бориб ҳарорат яна кўтарилади

Бугун эрталаб Ўзбекистон ҳудудига жанубий Уралдан салқин ҳаво кириб келди. Қуруқ, аммо салқин ҳаво массасининг кириб кириши ҳарорат фонининг иқлимий меъёрларгача пасайишида акс этди, деб ёзмоқда «Ўзгидромет».

Қайд этилишича, 20 сентябрь, кундуз куни республика ҳудудининг катта қисмида ҳарорат 26-29 даражани, шимолда 22-25 даражани, республика жанубида 32-35 даражани ташкил этади. Республиканинг барча ҳудудларида асосан кам булутли об-ҳаво сақланиб туради.

Ҳафтанинг катта қисмида республика бўйича асосан шундай қуруқ ва салқин об-ҳаво ҳукумронлик қилади. Ҳаво ҳарорати кечалари 10-15 даража, кундуз кунлари 26-31 даража атрофида бўлади. Бундай об-ҳаво Ўзбекистон бўйича сентябрь ойи охири учун хосдир.

Ҳафта охирига келиб антитциклон периферияси Қозоғистон ҳудудига чекина бошлайди. Ҳаво ҳарорати яна кўтарилади ва ҳафта охирига 32-35 даражани ташкил этади.

24 сентябрь, жума куни республика шимолида шамол тезлиги 15-20 метр/секундгача кучайиши мумкин.

Эслатиб ўтамиз, «Ўзгидромет» 19 сентябрь, якшанба кунидан бошлаб совуқ фронт кириб, қуруқ ва салқин ҳаво Ўзбекистоннинг барча ҳудудига тарқалишини, Янги ҳафта бошида эса совуқ антициклон таъсири кучайишини маълум қилганди.