Дунё ва ўзбек спортига оид 17 сентябрь кунининг энг муҳим хабарлари дайжести билан танишинг.
Ўзбекистон
Суперлиганинг 19-туридан ўрин олган учрашувлар 19—21 сентябрь кунлари бўлиб ўтади. ПФЛ ушбу баҳсларда ишлайдиган ҳакамларни эълон қилди. Мазкур тур доирасидаги «Сурхон» — «Насаф» учрашуви қаршиликларнинг ОФК Кубогидаги ўйини сабаб номаълум муддатга қолдирилган.
Тошкентда Аёллар ўртасидаги Осиё Кубоги саралаш босқичи старт олди. Дастлабки турда Жанубий Корея терма жамоаси Мўғулистонни 12:0 ҳисобида таслим этди. 20 сентябрь куни Ўзбекистон мўғулистонликларга қарши ўйнайди. 23 сентябрда эса Ўзбекистон — Жанубий Корея учрашуви ўтказилади. Эслатиб ўтамиз, гуруҳда биринчи ўринни эгаллаган жамоа финал босқичига йўл олади.
Жаҳон
Европа майдонларида 16 сентябрь куни Европа Лигаси ва Конференциялар Лигасининг 1-тур учрашувлари ўтказилди.Элдор Шомуродовнинг «Рома»си янги ташкил этилган Конференциялар Лигаси дастлабки турида Софиянинг «ЦСКА»сини қабул қилиб, 5:1 ҳисобида ғалаба қозонди. Ушбу учрашувда тўлиқ ҳаракат қилган Шомуродов иккита голли узатмага муаллиф бўлди. FotMob портали ўзбекистонликни учрашувнинг энг яхши ўйинчиси (9 балл) деб топган бўлса, SofaScore талқини бўйича Элдор иккинчи энг яхши футболчиси бўлди (7,7 балл).
Ҳар учала Еврокубокда ҳафтанинг энг яхши ўйинчилари аниқланди
«Аякс» сафида ЕЧЛда дебют қилган Себастьен Аллер Чемпионлар Лигаси 1-турининг энг яхши ўйинчиси бўлди. Аллер «Спортинг»га қарши ўйинда (5:1) да тўртта гол урганди.
«ПСВ» форварди Марио Гётце эса Европа Лигасида тенгсиз бўлди. Немис футболчиси «Реал Сосьедад»га қарши беллашувда биттадан гол ва голли узатма амалга оширганди.
Конференциялар Лигасида эса Стипе Перица («Маккаби Тель-Авив») энг яхши ўйинчи бўлди. Хорватиялик футболчи «Алашкерт»га қарши ўйинда битта гол ва битта голли узатма амалга оширганди.
Жасур Яхшибоев ва «Шериф»нинг бошқа футболчилари мукофот пулига эга бўлади
Чемпионлар Лигасидаги дебют ўйинида «Шахтёр»ни мағлуб этган «Шериф» клуби мазкур ғалабадан қанча ишлаб топгани ва бу сумманинг қанча қисми футболчиларга берилиши маълум бўлди. Қайд этилишича, «Шериф» ЕЧЛ гуруҳ босқичидаги ғалаба учун УЕФА 2,8 миллион евро мукофот пули олади. Бу миқдорнинг 1 миллиони футболчилар ва мураббийлар штаби вакиллари орасида тақсимланади. Қолгани эса клуб бюджетига кетади. Бу орқали асосий таркибда майдонга тушган Яхшибоев тахминан 25—35 минг евро атрофидаги мукофот пулига эга бўлганини тахмин қилиш мумкин.
Кингсли Коман юрагидан операция қилинди
«Бавария» ҳужумкор ярим ҳимоячиси юрагидаги муаммо сабаб жарроҳлик столига ётган. Бу ҳақда мюнхенликлар клуби матбуот хизмати маълум қилди. Футболчи 1,5—2 ҳафта тикланиш жараёнида бўлади.
Молиявий масалалар бўйича «Барселона» вице-президенти Эдуард Ромеу «Реал» президенти Флорентино Перес олдида шляпасини ечишга тайёрлигини билдирди.
«Улар ҳақиқатда Мбаппе ва Ҳоландни сотиб олишга қодир. «Реал» — катта ва жуда кучли клуб. Агар биз сўнгги йилларда диққатлироқ бўлганимизда худди улар каби қудратли бўлишимиз мумкин эди.
Флорентино Перес клубни қандай бошқараётганини кўриб, унинг олдида шляпангни ечгинг келади. Молиявий ва бизнесга оид соҳада ҳеч ким мистер Переснинг олдига туша олмайди. Унинг иш юритиш услубига ҳавас қиламан. Уни фақат олқишлашим мумкин», — дейди Ромеу.
«Манчестер Юнайтед» 2020/21 йилги мавсумни 92,2 миллион фунт зарар билан ёпди
Клубнинг даромади аввалига 627,1 миллиондан 509 миллионга, кейинчалик 494,1 миллион фунтга пастлаган. 30 июнь ҳолатига кўра сўнгги бир йилликдаги зарар 92,2 миллион фунтни ташкил қилган. Бунга коронавирус пандемияси сабаб бўлган. «Юнайтед»нинг қарзи 471,1 миллиондан 419,5 миллионга пастлаган. Маош фонди эса 13,6 фоизга (322,6 млн фунт) ўсган.
Изоҳ (0)