Конференциялар Лигаси. Элдор Шомуродов 2 та голли узатма берган ўйинда «Рома» йирик ҳисобда ғалаба қозонди
Футбол бўйича Европа Конференциялар Лигасининг 1-туридан ўрин олган ўйинда «Рома» 16 сентябрь, пайшанба куни «ЦСКА София» билан баҳс юритди.
Римда ўтган ўйинда умумий ҳисобда 6 та гол урилди. Дастлаб 10-дақиқада меҳмонлар ҳисобни очишга муваффақ бўлганди. Бироқ Жозе Моуриньо шогирдлари 25-дақиқада Лоренцо Пеллегринининг голидан сўнг мувозанатни тиклади. 38-дақиқага келиб, Стефан аш-Шаарави Элдор Шомуродовнинг узатмасини голга айлантирди ва жамоасини ҳисобда олдинга олиб чиқди. Шундан кейин «Рома» яна 3 бор Болгария клуби дарвозасига йўл топди. Пеллегрини дублни расмийлаштирган бўлса, Жанлука Манчини ва Тэмми Абраҳам ҳам ўз номига гол ёздириб қўйди. Абраҳамнинг голига ҳам Элдор Шомуродов ассистентлик қилди, ўзбекистонлик ҳужумчи бу вазиятда жамоадошини дарвозабон билан бирга-бир вазиятга олиб чиқди.
Шу тариқа «Рома» Конференциялар Лигаси гуруҳ босқичидаги илк ўйинни йирик ғалаба билан бошлади. Шомуродов эса 2 та голли узатмани амалга оширди.
«Тоттенҳэм» «Ренн» майдонига сафар қилиб, 2:2 ҳисобидаги дурангга имзо чекди. Француз жамоаси сафида Флавен Те ва Гаэтан Лаборд гол урган бўлса, Пьер Ҳёйбьерг «шпорлар»ни мағлубиятдан қутқариб қолган голга муаллифлик қилди.
Конференциялар Лигаси
1-тур баҳси
16 сентябрь, пайшанба
«Рома» Италия – «ЦСКА София» 5:1
Голлар: 0:1 – 10 Кери, 1:1 – 25 Пеллегрини, 2:1 – 38 аш-Шаарави, 3:1 – 62 Пеллегрини, 4:1 – 82 Манчини, 5:1 – 84 Абраҳам.«Рома» – Руй Патрисиу, Карсдорп (Рожер, 46), Смоллинг, Манчини, Калафёри (Кумбула, 77), Пеллегрини (Абраҳам, 75), Вильяр (Верету, 58), Диавара (Кристанте, 58), аш-Шаарави, Шомуродов, Карлес Перес.
«ЦСКА София» – Бузатто, Турицов (Дончев, 74), Матей, Галабов, Мазику, Ёмов (Бе, 68), Лам, Мухар, Кери, Крастев (Ахмедов, 87), Вилдсхут.
Огоҳлантиришлар: Вилдсхут (67), Лам (90).
Четлатиш: Вилдсхут (80).
