Ўзбекистон ташқи ишлар вазири Абдулазиз Комилов 2021 йилнинг 28 август куни Япония ташқи ишлар вазирининг парламентар ўринбосари Сатоши Наканишини қабул қилди.
Ўзбекистон ТИВ раҳбари суҳбат аввалида Япония томонини мураккаб пандемия даврида Токиода ёзги Олимпия ўйинларининг муваффақиятли якунлангани билан табриклади ва Паралимпия ўйинларини ўтказишда омад тилади.
Суҳбат чоғида ўзаро манфаат касб этадиган соҳаларда кўп қиррали Ўзбекистон–Япония стратегик шерикчилигининг долзарб масалалари муҳокама қилинди.
Олий даражада эришилган келишувларни ўз вақтида ва сифатли амалга ошириш муҳимлиги қайд этилди.
Асосий халқаро ва минтақавий масалалар, хусусан, Афғонистондаги ҳозирги вазият юзасидан фикр алмашилди.
Бўлажак икки томонлама ҳамда «Марказий Осиё+Япония» мулоқоти доирасидаги тадбирлар жадвали ва ташкилий жиҳатлари кўриб чиқилди.
Савдо-иқтисодий алоқаларни янада фаоллаштириш, янги инвестицион лойиҳаларни амалга ошириш ва икки мамлакат бизнес вакиллари ўртасида ишбилармонлик алоқаларини рағбатлантириш бўйича қўшма биргаликда чора-тадбирлар кўриш зарурлиги таъкидланди.
Бундан аввал Абдулазиз Комилов Покистон ташқи ишлар вазири Шоҳ Маҳмуд Қурайший билан учрашув ўтказгани ҳамда Абдулазиз Комилов Саудия Арабистони ташқи ишлар давлат вазири билан Афғонистондаги воқеаларни муҳокама қилгани ҳақида хабар берилганди.
Изоҳ (0)