Бухоро туманида содир этилган ўғрилик жинояти бармоқ излари юзасидан ўтказилган криминалистик тадқиқот натижасида фош этилди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, 2021 йилнинг 12 август куни Бухоро туман ИИБга мурожаат келиб тушиб, унда туманнинг «Дилобод—Зафаробод» маҳалласидаги Диосиё қишлоғида яшовчи Ғ.Г.нинг яшаш хонадонида ўғрилик содир бўлгани, хонадон ётоқхонасидан номаълум шахслар томонидан 15 турдаги тилла тақинчоқлар ўғирлангани ҳақида хабар берилган.
Мазкур хабар асосида туман ички ишлар бўлими тергов-тезкор гуруҳи томонидан кечиктириб бўлмас суриштирув ҳамда терговга қадар текширув ҳаракатлари олиб борилган. Ҳодиса содир бўлган жой тўлиқ кўздан кечирилган. Жараёнда воқеа жойидан 21 дона бармоқ излари олинган. Ва жиноий ҳодиса юзасидан Жиноят кодексининг 169-моддаси 3-қисми «в» (кўп миқдорда ўғрилик) банди билан номаълум шахсга нисбатан жиноят иши қўзғатилган, дастлабки тергов ҳаракатлари олиб борилган.
Вилоят ИИБ эксперт криминалистика бўлими криминалистлари томонидан воқеа жойидан олинган 21 дона бармоқ изи устида ўтказилган криминалистик тадқиқотлар ва шахсни автоматлаштирилган дактилоскопик идентификация қилиш тизими орқали ўтказилган текширувда деразанинг синган шишаси юзасидан кўчириб олинган икки дона бармоқ изи 30 ёшли Х.А. исмли шахснинг ўнг қўл бош ва номсиз бармоқларидан қолдирилгани аниқланган.
Дактилоскопик экспертиза хулосасига асосан, туман ИИБ ходимлари томонидан олиб борилган тезкор-излов ва тергов ҳаракатлари давомида ушбу жиноятни ҳақиқатдан ҳам фуқаро Х.А. содир қилгани аниқланган ва у ўз айбига иқрорлик билдирган.
Ҳозирги кунда жиноят ишида гумон қилинувчи Х.А.га нисбатан айблов эълон қилиниб, қамоққа олиш тарзидаги эҳтиёт чораси қўлланилган ҳолда тергов ҳаракатлари давом эттирилмоқда.
Изоҳ (0)