Ўзбекистонда 24 октябрь куни ўтказиладиган президент сайлови муносабати билан сиёсий партияларга айрим оммавий тадбирларни ўтказишига рухсат берилди. Бу ҳақда Соғлиқни сақлаш вазирлиги хабар қилди.
Фото: «Дарё»
Қайд этилишича, Ўзбекистоннинг Сайлов кодексига мувофиқ, Ўзбекистон Президентлигига номзодларга ва сиёсий партияларга сайловчилар билан учрашувлар ўтказиш орқали ташвиқот олиб бориш ҳуқуқи таъминланади. Сайловчилар билан учрашувлар номзодлар ва сиёсий партиялар томонидан мустақил равишда ўтказилади.
Шу муносабат билан Республика махсус комиссиясининг навбатдаги йиғилишида сиёсий партияларнинг сайловолди жараёнларда фаол иштирок этиши учун зарур шарт-шароит яратиш, ушбу муҳим сиёсий жараёнда сиёсий партияларнинг қонун билан кафолатланган сайловолди тадбирларини амалга оширишларини таъминлаш билан боғлиқ айрим масалалар кўриб чиқилди.
Хусусан, комиссия қарори билан Ўзбекистонда фаолият кўрсатувчи сиёсий партияларнинг Ўзбекистон Президенти сайлови кампаниясини юқори савияда халқаро стандартларга мос равишда ўтказиш мақсадида сайлов тўғрисидаги қонун ҳужжатларига мувофиқ Ўзбекистон Президентлигига номзодларга ва сиёсий партияларга сайловчилар билан учрашувлар каби оммавий тадбирларни ўтказиш тўғрисидаги таклифлари маъқулланди.
Бунда сиёсий партияларга сайловчилар билан учрашувлар ўтказишда иштирокчилар ўртасида ижтимоий масофани сақлаш, тиббий ниқобда бўлиш, антисептик воситалардан фойдаланишга риоя этиш каби санитария-гигиена ва карантин талабларига риоя этишга ҳамда учрашувларга таклиф этилаётган фуқароларнинг коронавирус инфекциясига қарши эмланганлигига эътибор қаратиш тавсия этилди.
Бундан аввал Марказий сайлов комиссияси 5 та сиёсий партия вакилларига Президент сайловида иштирок этиш учун гувоҳнома топширгани, чет элдаги Ўзбекистон фуқаролари учун 49 та давлатда стационар ва кўчма сайлов участкалари ташкил этилиши ҳамда Ўзбекистон Президенти сайловларини ўтказиш учун сайлов округлари ташкил этилгани ҳақида хабар берилганди.
