Италияда Сицилия оролидаги Этна вулқони 9 август куни отила бошлади. Бу ҳақда Rai News хабар берган.
Хабарга кўра, вулқон, тахминан, тунги соат 01:40 да отила бошлаган ва тонг вақти билан соат 05:00 атрофида тўхтаган. Вулқон баланд овоз чиқарган ва отилган лава оқими юқори бўлган.
Вулқон отилган вақтда ҳудудда 4,5 магнитудали зилзила ҳам содир бўлган. Ҳодиса туфайли Катания аэропортидан амалга ошириладиган рейслар кечиктирилган.
Сицилиядаги Этна вулқони деярли бир ой аввал, 2021 йил 8 июлда отилганди.
Аввал Индонезияда Мерапи вулқони отила бошлагани, Суматра оролидаги вулқон шаҳарларнинг кул билан қопланишига сабаб бўлгани ҳақида хабарлар берилганди.