Мудофаа вазирлиги оталиққа олган Тошкент вилояти Оққўрғон туманида туғилган, 20 ёшли Мафтуна Ўсарова 2 август куни Германияга даволанишга юборилди. Бу ҳақда вазирлик «Дарё»га хабар берди.
Маълум қилинишича, Мафтуна Ўсарова 2016 йилда дунёда жуда кам учрайдиган «Tакаясу синдроми», яъни магистрал қон томирлари торайиши оқибатида инсультга чалинган ва биринчи даражали ногирон бўлиб қолган.
Ҳозирда у Мудофаа вазирлиги ташаббуси билан Германиянинг Асклепиос клиникасида 3 кун давомида ихтисослаштирилган текширувлардан ўтказилди ва интенсив даволаш-соғломлаштириш муолажаларини олмоқда.
Таъкидланишича, Мудофаа вазирлиги доимий равишда Германия клиникаси мутахассисларидан даволаш жараёнларини ўрганиб, назорат қилиб бормоқда. Айни пайтда Мафтуна Ўсарованинг соғлиғи яхшиланиб бормоқда, дейилади хабарда.
Бундан аввал Шавкат Мирзиёевни йиғлатган Сабрина Инсофалиева даволаниш учун Россияга юборилгани ҳақида хабар берилганди.
Изоҳ (0)