Афғонистон ҳукумати қўшинлари билан тўқнашувда «Толибон»нинг Қундуз вилояти Дашт Арчи туманидаги етакчиси Мулави Шаҳа Маҳумда ва ҳаракатнинг 11 жангариси йўқ қилинди. Бу ҳақда Афғонистон Мудофаа вазирлиги матбуот маркази раҳбарининг ўринбосари Фавад Омонга таяниб, «Интерфакс» хабар берди.
Бир кун олдин «Толибон» мамлакатнинг шимоли-шарқидаги Тахор вилояти маркази Талукан ва Бадахшон вилояти маркази Файзобод шаҳарларига катта ҳужумлар уюштириб, мамлакат жануби-ғарбидаги Нимрўз вилояти маркази Заранж шаҳрига деярли жангсиз кириб борган.
«‘Толибон’нинг Бадахшон вилояти маркази Файзобод шаҳри ва Тахор вилояти пойтахти Талукан шаҳрига уюштирган ҳужумлари Афғонистон миллий армияси ва халқ кўнгилли кучлари томонидан қайтарилди. Шаҳарлар чеккасидаги жавоб операцияси чоғида ўнлаб жангарилар ўлдирилди ва яраланди», — дея қўшимча қилди Омон.
Унинг хабарига кўра, ўтган тунда Афғонистон ҳарбий-ҳаво кучлари Нимрўз вилояти маркази Заранж шаҳридаги «Толибон» позицияларига авиазарбалар йўллаган, натижада ҳаракатнинг яна бир етакчиси Абдул Холиқ ва бошқа 14 жангари йўқ қилинган.
Ўтган бир суткада миллий мудофаа кучлари ҳаммаси бўлиб «Толибон»нинг 385 жангарисини йўқ қилган, 210 жангарини яралаган.
Аввалроқ ижтимоий тармоқларда Заранжнинг айрим туманларини жангарилар босиб олгани ҳақидаги видеолар пайдо бўлган эди. Маҳаллий манбаларнинг таъкидлашича, шаҳарнинг катта қисми ҳеч қандай қаршиликсиз «Толибон» назорати остига ўтган. Аҳоли жойлаган видеоларда вилоят қамоқхонаси маъмурияти ва соқчилари қочиб кетганидан сўнг, ўнлаб маҳбуслар ҳибсдан чиқиб кетаётгани тасвирланган.
Афғонистондан АҚШ контингентини олиб чиқиш бошлангач мамлакатдаги вазият кескинлашди. 22 июль куни Толибон Афғонистон чегараларининг 90 фоизини назорат қилаётганини айтди, расмийлар буни инкор этмоқда. Евроиттифоқнинг Афғонистондаги махсус элчиси вазифасини бажарувчи Томас Никлассоннинг айтишича, агар «Толибон» Афғонистонда ҳокимиятни ҳарбий йўл билан эгаллаб оладиган бўлса, уларнинг ҳукумати Евроиттифоқ ва минтақадаги кўпчилик давлатлар томонидан тан олинмайди.
Аввалроқ Россия Афғонистондаги ҳокимият «Толибон» жангарилари томонидан тўлиқ эгаллаб олиниши сценарийсига тайёрлиги, аммо воқеаларнинг бундай ривожланишини ҳақиқатдан йироқ деб ҳисоблашини маълум қилганди.
Изоҳ (0)