Тошкентда 7 ёшли боласи билан кўчада қолгани айтилган аёлнинг ҳолати Сенат томонидан назоратга олингани ҳақида хабар берилганди. Ҳолат Сенатнинг Хотин-қизлар ва гендер тенглик масалалари қўмитасида ўрганиб чиқилиб, қуйидагилар аниқланди.
Видеода 7 ёшли фарзанди билан кўчада қолгани айтилган Ш.З. 1983 йилда Наманган вилоятининг Чуст туманида туғилган. У 2007 йилда Чуст тумани «Олмос» маҳалласига келин бўлиб тушган ва ўртада фарзанд бўлмагани туфайли биринчи турмушидан ажрашган. Аёл 2009 йил Тошкент вилояти, Чирчиқ шаҳрига ишлаш мақсадида келганида ўзи билан иссиқхонада бирга ишлаган 1981 йилда туғилган А.А.га шаръий никоҳ билан турмушга чиққан. Улар 2014 йилда қиз фарзандли бўлган.
Шундан сўнг Ш.З. 2018 йил ўзаро оилавий келишмовчилик сабаб ота-онасининг уйига, Наманган вилоятига қайтиб келган. Руҳиятидаги ўзгаришлар сабаб 2018 йилнинг апрель ойида Тўрақўрғон туманида жойлашган руҳий касалликлар шифохонасида даволанган.
Касалхонадан чиққандан сўнг, 1 ҳафта ота-онаси билан бирга яшаб, уларнинг қаршилигига қарамай қизи билан бирга турмуш ўртоғи А.А. олдига кетган. 2020 йилда оилавий низолар сабаб фарзанди билан уйдан чиқиб кетган.
Ижтимоий тармоқлар орқали тарқалган маълумотлардан сўнг аёл фарзанди билан Тошкент шаҳар, Юнусобод тумани маҳалла фаоллари ва ичик ишлар органлари ходимлари томонидан топилиб, тумандаги «Отчопар-1» маҳалласида мавжуд оилавий ётоқхонага вақтинча жойлаб қўйилган. Сўнг аёл шахсига аниқлик киритилиб, оила аъзоларига хабар берилган, натижада Ш.З.нинг синглиси Н.Н. ва ҳамда укаси Э.З. 2021 йилнинг 2 август куни опаси Ш.З.ни 7 ёшли фарзанди билан соғ-саломат Наманган вилояти Чуст туманига олиб кетган.
Таъкидланишича, ҳозирда аёл ота-онаси билан бирга яшаб келмоқда. Бугунги кунда унинг бандлигини таъминлаш мақсадида «Баймоқли» МФЙ томонидан маҳаллада яшовчи тикувчи Х.Т.га устоз-шогирд анъанаси бўйича бириктирилди. Шунингдек, аёлнинг фарзанди Наманган вилояти Чуст туманидаги 14-умумтаълим мактабининг 1-синфига ўқишга қабул қилиниши учун рўйхатга қўйилди.
Бундан аввал Ўзбекистонда янги меҳрибонлик уйларини очмаслик таклиф этилгани, Шавкат Мирзиёев «ёшлар дафтари» орқали ўз ишини бошлаган Азиза Самиғовага 3 хонали уй совға қилгани ҳамда Тошкентда йўл четида аёлга куч ишлатиб, сочидан тортган эркак видеоси юзасидан маълумот берилгани ҳақида хабар берилганди.
Изоҳ (0)