Вазирлар Маҳкамасининг «Ҳаётий муҳим инфратузилмаларни қўллаб-қувватлаш дастури: электр энергия соҳасини қўллаб-қувватлаш» лойиҳасини амалга ошириш чора-тадбирлари тўғрисидаги қарори қабул қилинди, деб хабар беради Norma.
Фото: Flickr
Унга кўра, Европа тикланиш ва тараққиёт банки (ЕТТБ) Ўзбекистонга соҳа ривожи учун 81,6 миллион евро миқдорида кредит ажратади.
Кредит маблағлари 7 йил муддатга, 30 ойлик имтиёзли давр билан йиллик 1 фоиз плюс 6 ойлик Euribor ставкасида ва мажбурият учун комиссия 0,5 фоиз ставкасида тақдим этилган.
Қарор билан «Иссиқлик электр станциялари» АЖ лойиҳанинг амалга оширилишини мувофиқлаштириш ва мониторинг қилиш бўйича масъул этиб белгиланган.
Шунингдек, «Тошкент иссиқлик электр станцияси», «Навоий ИЭС», «Сирдарё ИЭС», «Тахиатош ИЭС», «Талимаржон ИЭС» АЖ айланма маблағлари ва операцион ликвидлик эҳтиёжларини молиялаштириш учун ЕТТБ томонидан ажратиладиган қарздан мақсадли ҳамда самарали фойдаланиш бўйича ташаббускор масъул ижрочилар — қарз олувчилар ҳисобланади.
Банк томонидан ажратилган қарзни қайтариш, фоизлар, бир марталик комиссия ва бошқа харажатлар билан боғлиқ тўловлар тегишлилиги бўйича ИЭСларнинг ўз маблағлари ҳисобидан амалга оширилади.
Аввалроқ Самарқанд Ўзбекистонда биринчи бўлиб ЕТТБнинг «Яшил шаҳарлар» дастурига қўшилгани, Европа тикланиш ва тараққиёт банки иштирокида Чуст, Поп ва Наманган туманларидаги ичимлик суви таъминоти яхшиланиши тўғрисида хабар берилганди.
