Ангрендаги тўққиз қаватли уйларнинг бирида ёнғин чиқди (видео)

Тошкент вилояти Ангрен шаҳридаги кўп қаватли турар жой биноларининг бирида ёнғин содир бўлди, деб хабар беради ФВВ матбуот хизмати.

Маълум қилинишича, 5 август куни соат 09:00 да Тошкент вилояти Фавқулодда вазиятлар бошқармасига Ангрен шаҳри 5/1 даҳасида жойлашган тўққиз қаватли уйнинг 6-қаватида ёнғин содир бўлаётгани тўғрисида хабар келиб тушган.

ФВВнинг ёнғин-қутқарув гуруҳлари воқеа жойига беш дақиқа ичида етиб борган. Қутқарувчилар томонидан ёнғинни ўчириш билан бир вақтда бинонинг юқори қаватидаги фуқароларни эвакуация қилиш ишлари ҳам амалга оширилган.

«Бир неча дақиқа ичида 25 нафар фуқаро хавфсиз жойга олиб чиқилиб, ёнғин соат 09:38 да тўлиқ бартараф этилган. ФВВ ходимларининг аниқ ва тезкор ҳаракатлари натижасида жабрланиш ва ҳалок бўлиш ҳолатларига йўл қўйилмади», — дейилади хабарда.

Ёнғин оқибатида хонадоннинг 50 квадрат метр майдони зарарланган. Ҳозирда мутахассислар томонидан ёнғин сабаби аниқланмоқда.

Аввалроқ Қўқонда бир-бирига туташ 5 та хонадонда ёнғин содир бўлгани, Самарқандда 5 та хонадонда ёнғин юз бергани, Юнусободдаги иккита хонадонда ёнғин содир бўлгани ҳамда Намангандаги ҳовлида ёнғин чиқиб, учта қўшнининг уйига ҳам зарар етгани ҳақида хабар берилганди.