Сурхондарё вилояти Шеробод туманида 3 та машина иштирокидаги йўл-транспорт ҳодисаси оқибатида бир киши вафот этди, дея хабар бермоқда вилоят ЙҲХБ.
Қайд этилишича, 2021 йил 29 июль куни соат 11:30 ларда Шеробод тумани «Деҳқонариқ» МФЙ ҳудудидан ўтувчи маҳаллий аҳамиятга эга 4Р103 автомобиль йўлининг 17-километрида йўл-транспорт ҳодисаси содир бўлди.
1998 йилда туғилган, ҳайдовчилик гувоҳномасини олганига 1 йил бўлган фуқаро Cobalt автомашинасини бошқариб йўлнинг қарама-қарши бўлагига чиқиб кетган.
Шунда машина қаршисидан келаётган Nexia’нинг ўнг томонидан ҳамда шу йўналишда келаётган Damas’нинг чап томонига урилиши оқибатида икки машина ағдарилиб кетган.
Оқибатда Damas автомашинасида йўловчи сифатида келаётган 1953 йилда туғилган фуқаро Шеробод тумани тиббиёт бирлашмасида вафот этди.
ЙТҲ сабаблари ўрганилиши натижасида йўл талабга жавоб бермаслиги, ётиқ чиқилар ўчиб кетгани аниқланган.
Бундан аввал Тошкентда бешта автомобиль олдинма-кетин тўқнашгани, Самарқандда Lacetti катта тезликдан йўл ёқасидаги уйга урилиши оқибатида ҳайдовчи ва йўловчи вафот этгани ҳамда Андижонда Damas ва иккита Nexia иштирокида содир бўлган ЙТҲ оқибатида 26 ёшли йўловчи ҳалок бўлгани ҳақида хабар берилганди.
