«Биз бефарқ эмасмиз»: Наманганда кўнгиллилар эҳтиёжманд оилалар учун 132 хонадонли уй-жой мажмуасини қурмоқда (фото ва видео)

Наманганда саховатпеша инсонлар томонидан эҳтиёжманд оилалар учун 132 хонадонли уй-жой мажмуаси қурилмоқда. Бу ҳақда «Дарё» мухбири Азизбек Абдувалиев хабар бермоқда.

Мазкур мажмуа Наманган шаҳрининг Давлатобод туманида, «Юксалиш» даҳасида барпо этилмоқда. Ундаги уйлар бир, икки ва уч хонали бўлиб, боқувчисини йўқотган, уй-жойга муҳтож оилаларга бепул тақдим этилади.

Мажмуадан болалар шуғулланиши ва таълим-тарбия олиши учун спорт ва ўқув марказлари ўрин олиши кўзда тутилган.

Шунингдек, тикувчилик йўналишидаги ишлаб чиқариш корхонаси ҳам фаолият кўрсатиши кўзда тутилган бўлиб, мазкур корхонада бу ерда истиқомат қиладиган хотин-қизлар бандлиги таъминланиши режалаштирилган.

Уй-жойлар «Саховат-Наманган» хайрия жамоат фонди томонидан барпо этилмоқда.

Жорий йил февраль ойида расмий рўйхатдан ўтган ушбу фонд шу пайтгача эҳтиёжманд оилалар учун якка тартибда уй-жой қуриб бериш, мукаммал таъмирлаш билан шуғулланиб келган, фойдаланишга топширилган уй ва коттеджлар сони 30 дан ошган бўлса, кейинчалик бундай оилалар учун бутун бошли мажмуа қуриб бериш ғояси туғилди.

Ушбу ташаббус маҳаллий расмийлар томонидан қўллаб-қувватланди.

Ҳозирда 3 қаватли, 5 блокдан иборат мажмуанинг биринчи блоки томи ёпилди. Фонд ихтиёрида 500 дан ортиқ муҳтож оиланинг уй-жой бўйича мурожаати бор. Комиссия уларни ўрганиб чиқиб, энг зарурларига хонадонларни ажратиб беради. Мажмуа жорий йил охиригача фойдаланишга топширилиши кўзда тутилган.

«Фондимиз асосан уч йўналишда фаолият олиб бормоқда. Боқувчисини йўқотганларнинг рўзғорларига кўмаклашиш, уйсизларни уй-жой билан таъминлаш ва эҳтиёжманд оилаларга мансуб беморларга ёрдам бериш. Бу ёрдам дори-дармон, ногиронлик аравачалари ёки операциялар тариқасида бўлиши мумкин. Шунингдек, кейинги пайтларда фондимиз кўнгиллилари томонидан мунтазам равишда қон топшириш акциялари ўтказиб келинмоқда. Мақсад пандемия шароитида қийинчилик сезаётган оилаларни моддий ва маънавий қўллаб-қувватлаш, бу борада вилоятда олиб борилаётган хайрли ишлар кўламини янада кенгайтиришдан иборат, — дейди «Саховат-Наманган» хайрия жамоат фонди васийлик кенгаши раиси Маъруфхон Ражаббоев.

Хайрия жамоат фонди жамоасида 13 нафар кенгаш аъзоси, 130 дан ортиқ кўнгиллилар бор. Барчаларининг йўналишлари ва вазифалари тақсимланган. Ҳар ойда ўртача 1,5 мингдан ортиқ хонадондан хабар олинади, улардан 400 дан ошиғи доимий назоратда.

Ушбу хонадонларда бир нафардан тортиб 4-5 нафарга боқувчисини йўқотганлар истиқомат қилади. Уларга озиқ-овқати, кийим-кечаги, дори-дармони ҳар ойда мунтазам бериб борилади.

«Кўнгиллилар сафида тадбиркорлар кўп. Ҳайрон қоласиз, қўлида 50-100 нафар ишчи-ходими бор, лекин бизда оддий юмушларни бажаришади. Қурувчилик ё ҳайдовчилик қилишади, маҳсулотларни қадоқлаш, тарқатишда иштирок этишади. Наманганнинг саховатпеша инсонлари бор бўлсин, савоби ота-онамизга тегсин, ортиқча уй-жойимиз бор эди деб хонадонлари калитини бериб кетадиганлар бор. Омборимизга ўзлари ишлаб чиқарган маҳсулотларни етказиб берадиганлар кўп. Ғишт ё тунуками, асал ёки печеньеми, ҳатто дала ва боғларида етиштирган маҳсулотлар бўлиши мумкин. Давлат раҳбари томонидан юргизилаётган камбағалликдан чиқариш сиёсати бизга бу борада жуда қўл келяпти, — дейди «Саховат-Наманган» хайрия жамоат фонди бошқаруви аъзоси Маъруфхон Мўминов.

Маълумот учун, Намангандаги саховатпеша кўнгиллилар «Биз бефарқ эмасмиз» шиори остида фаолият олиб бормоқда. Вилоятда мазкур шиорга мос кўплаб хайрли ишлар амалга оширилмоқда.