Турк киносаноати вакиллари томонидан тақдим қилинган сериаллар ўзига хос сюжетга эга эканидан ташқари, унда рол ижро қилган актрисаларнинг гўзаллиги билан ҳам машҳур саналади.
Ҳанде Эрчел
Фото: Milliyet
«Эшигимни қоқ» сериал юлдузи карьерасини халқаро гўзаллик танловида иштирок этишдан бошлаган. 19 ёшда иккинчи ўринни эгаллагани ўзига бўлган ишончининг ортишига сабаб бўлган. Суратга чиройли тушадиган актрисани ижтимоий тармоқлардаги ҳар бир фотосига минглаб лайк босилади ва изоҳ қолдирилади. Instagram саҳифасида 23 миллион обуначиси бўлган Ҳанде спорт билан шуғулланиш ва тўғри овқатланишни канда қилмайди.
Фаҳрие Эвжен
Фото: Milliyet
«Чолиқуши» сериали юлдузи йиллар давомида қилган ҳаракатлари натижаси ўлароқ, мукаммал қоматга эга бўлишга муваффақ бўлган. Бурак Ўзчивитнинг рафиқаси сифатида маълум бўлган актриса кун давомида спорт билан шуғулланишдан ташқари, тиниқиб ухлаш ва тўғри овқатланишга ҳам амал қилади. Шунингдек, у инсон ўзи билан уйғун бўлиши ва руҳий ҳолати ҳақида қайғуриши керак деб ҳисоблайди. Унинг фикрича, асабийлик ҳамда хавотир, албатта, ташқи кўринишга таъсир қилади ва буни ҳеч қандай косметик воситалар билан яшириб бўлмайди. Парвариш борасида эса Фаҳрие тери ва сочларни намлантирувчи ёғли, табиий маҳсулотларни афзал билади. Табиий кўринишни яхши кўришига қарамай, кўзларига урғу бериб, ёрқин макияж қилишдан воз кечмайди.
Неслиҳан Атагул
Фото: «Woman’с Day.ru»
Маҳоратидан ташқари эсда қоларли кўринишга эга экани сабаб Неслиҳан кўплаб мухлислар учун севимлига айланган. Камдан кам ҳолларда макияж қиладиган актриса кўпроқ парвариш қиладиган косметик воситалар, табиий маҳсулотлардан фойдаланади. Сочлар мустаҳкамлиги ва тери саломатлиги учун органик ёғ ҳамда асалдан тайёрланган ниқоб ишлатади. Қолаверса, 28 яшар актрисанинг эътиборидан тўғри овқатланиш ҳамда тиниқиб ухлаш ҳам четда қолмайди.
Марям Узерли
Фото: Milliyet
«Муҳташам юз йил» сериалидаги ролидан кейин машҳурликка эришган актриса суратга олиш ишлари тугаганидан кейин вазн ташлаш учун ҳаракатни бошлаб юборган. Эндиликда эса у ҳаётини спорт ва тўғри овқатланишсиз тасаввур қила олмайди. Сериалда малла сочлар билан кўриниш берганига қарамай, Марям суратга олиш ишлари якунига етганидан кейин ўзининг табиий соч рангига яқин ранглар билан эксперимент қила бошлаган. Ўзига хос кўриниши туфайли бир қатор машҳур брендларнинг юзига айланган Узерли ўзини бошқалар айтганичалик чиройли деб ҳисобламайди.
Бергузар Корел
Фото: Milliyet
Ҳалит Эргенчнинг рафиқасини кўринишига назар ташлаб, уни 38 ёш эканига ишониш қийин. Ёш ва гўзал кўринадиган актрисанинг сири органик маҳсулотларни афзал билиши ва таомномасида сабзавот ва меваларнинг бисёр экани билан боғлиқ. У ҳатто суратга олиш майдончасида ҳам одатларини канда қилмай, уйидан тайёрлаб келган таом билан овқатланади. Бўш вақтида эса спорт ва рақс билан шуғулланади.
