Тожикистон ҳукумати тожик-афғон чегарасига туташ ҳудудлар хавфсизлигини таъминлаш учун Қозоғистондан ҳарбий-техник ёрдам олиш тўғрисида битим лойиҳасини имзолашга кўрсатма берди, деб ёзади Asia-Plus.

Фото: myseldon.com

Тожикистон ҳукумати номидан ҳужжатни мамлакатнинг Қозоғистондаги элчиси имзолайди. Шартнома лойиҳасида айтилишича, Тожикистонга ҳарбий-техник ёрдам ҳарбий мулкни беғараз топшириш шаклида амалга оширилади.

«Ҳарбий мулкнинг номлари ва ҳажми ушбу шартнома имзоланганидан кейин 2 ой ичида икки давлатнинг ваколатли органлари томонидан дипломатик каналлар орқали мувофиқлаштирилади», — дейилади лойиҳада.

Қабул қилинадиган ёрдам фақат тожик-афғон чегарасида хавфсизликни таъминлаш мақсадида ишлатилиши лозим. Ҳарбий техникани Душанбегача («Роҳати» темир йўл станциясигача) етказиб бериш Қозоғистон ҳукумати маблағлари ҳисобидан амалга оширилади.

«Қозоғистон Республикасидан ўтказиладиган ҳарбий мулкни божхона расмийлаштируви ва декларацияси Евросиё Иқтисодий Иттифоқи қонунчилигига мувофиқ амалга оширилади», — дейилади шартнома лойиҳасида.

Ўтказиладиган ҳарбий мулк барча турдаги божлар, солиқлар ва йиғимлардан озод қилинади.

Афғонистондаги вазиятнинг кучайиши фонида аввалроқ Россия ҳарбийлари Тожикистонда ўқув машғулотларини бошлаганди.

Шунингдек, Тожикистондаги ҳарбий полигонда 5—10 август кунлари бўлиб ўтадиган ўқув машғулотларида Россия ва Тожикистон ҳарбий хизматчиларидан ташқари, Ўзбекистон Қуролли Кучлари ҳам иштирок этади.

5 июль куни Тожикистон президенти Эмомали Раҳмон тожик-афғон чегарасини мустаҳкамлаш учун армия резервидаги 20 минг нафар ҳарбий хизматчини сафарбар этгани, Владимир Путин Тожикистонга Афғонистон билан чегарадаги вазиятнинг кескинлашуви муносабати билан ёрдам беришни ваъда қилгани, Ўзбекистон Президенти Шавкат Мирзиёев 5 июль куни Владимир Путин билан телефон орқали мулоқот қилиб, суҳбат давомида Афғонистоннинг шимолий ҳудудларидаги аҳвол ёмонлашиши фонида Марказий Осиёдаги вазиятнинг ривожига алоҳида тўхталиб ўтгани ҳақида хабарлар берилганди.