Токио—2020. Япониялик 13 ёшли қиз Олимпия чемпиони бўлди. Кумуш медал эгаси ҳам 13 ёшда

Япониялик 13 ёшли спортчи Момизи Нисия Токио—2020 Олимпиадасида скейтбординг бўйича олтин медални қўлга киритди.

Нисия стрит машқларида умумий ҳисобда 15,26 балл жамғарди ва мусобақа ғолибига айланди. Энг қизиғи, 14,64 балл билан кумуш медални қўлга киритган бразилиялик Райсса Лил ҳам 13 ёшда. Кучли учликка япониялик бошқа бир спортчи Фуна Накаяма якун ясаб берди — 14,49 балл.

Шу тариқа 13 ёш-у 330 кунлик Момизи Нисия энг ёш Олимпия чемпионлари орасида 3-ўринни эгаллади. Бу борадаги энг яхши натижа америкалик Маржори Гестринги тегишли бўлиб, у 3 метр баландликдан сувга сакраш бўйича 13 ёш-у 268 кунлигида тўрт йилликнинг энг нуфузли мусобақасида ғалаба қозонган. Иккинчи ўринда эса германиялик Клаус Зерта қайд этилган — 13 ёш-у 283 кун. Зерта 1960 йилги Олимпиадада эшкак эшиш (жамоавий баҳслар) бўйича чемпион бўлган.

Токио—2020 да скейтборд илк бор Олимпия ўйинлари дастурига киритилди. Бундан ташқари, Япониядаги мусобақада сёрфинг, каратэ ва спортча тоққа чиқиш каби спорт турлари ҳам Олимпиададаги дебютини ўтказмоқда.